₹20 లక్షల పెళ్ళి తప్పిదమా? పెద్ద మొత్తం ఖర్చు చేసే కుటుంబాలకు బెంగళూరు CA సందేశం

పెళ్ళిళ్ళకు లక్షలు ఖర్చు పెట్టడం నిజంగా అవసరమా అనే ప్రశ్న సోషల్ మీడియాలో చర్చకు దారి తీసింది. బెంగళూరులో CA గా పనిచేసే ఒక మహిళ తన అన్న పెళ్ళి ఖర్చులు చూసి తీవ్ర ఆందోళనకు గురైంది. ఆ పెళ్ళికి మొత్తం ₹20 లక్షలు ఖర్చు అయినట్లు తెలిసింది. అందులో తిండికి ₹6 లక్షలు, వివిధ ఫంక్షన్లకు ₹5 లక్షలు, డెకరేషన్‌కు మరికొన్ని లక్షలు, ఫోటోగ్రఫీకి ₹2 లక్షలు, DJ మరియు దోస్తుల దావత్‌కు మరికొన్ని లక్షలు ఖర్చు అయినాయి. బంధువుల ముందు హోదా చూపించాలని, తమ శక్తి ఎంతో నిరూపించుకోవాలని చాలామంది తమ సామర్థ్యానికి మించి ఖర్చు పెడుతున్నారు. అప్పులు చేసి పెళ్ళి చేసిన తర్వాత ఎవరూ ఆదుకోరు అని ఆమె స్పష్టంగా చెప్పింది. బంధువులు తిని తాగి వెళ్ళిపోతారు, ఏదైనా తక్కువైతే గొణుగుతారు కానీ అప్పుల్లో మునిగినప్పుడు మాత్రం పట్టించుకోరు అని ఆమె వివరించింది. నలుగురినీ పిలవొద్దని కాదు, మనకు ఎంత ఆదాయం వస్తుందో, ఎంత ఖర్చు పెడుతున్నామో అన్న లెక్క మాత్రం చూసుకోవాలని ఆమె సూచించింది. ఈ పోస్ట్ సోషల్ మీడియాలో వైరల్ అయి చాలామందిని ఆలోచింపజేస్తోంది.