నాగర్‌కర్నూల్‌లోని కుడికిల్ల గ్రామ శివాలయం నుంచి 200 ఏళ్ల నంది విగ్రహం చోరీ

నాగర్‌కర్నూల్ జిల్లా కుడికిల్ల గ్రామంలోని శివాలయం నుంచి సుమారు 200 ఏళ్ల పురాతన నంది విగ్రహాన్ని గుర్తు తెలియని వ్యక్తులు తీసుకెళ్లారు. గ్రామస్థుల ఫిర్యాదుతో పోలీసులు కేసు నమోదు చేసి దర్యాప్తు చేపట్టారు.

విగ్రహం కింద గుప్త నిధులు ఉన్నాయనే అనుమానంతో ఈ దొంగతనం జరిగి ఉంటుందని స్థానికులు భావిస్తున్నారు. ఆలయంలోని CCTV కెమెరాలకు చిక్కకుండా దుండగులు చోరీ చేసినట్టు తెలుస్తోంది. దీంతో ముందస్తు ప్రణాళికతో వారు వచ్చి ఉంటారని అనుమానం వ్యక్తమవుతోంది.

విగ్రహం కోసమే వచ్చారా, లేక నిధుల కోసం తవ్వకాలు జరపాలని వచ్చారా అనే కోణాల్లో పోలీసులు విచారణ చేస్తున్నారు. కొంత సమాచారం లభించినట్టు పోలీసులు తెలిపారు. త్వరలోనే విగ్రహాన్ని స్వాధీనం చేసుకుంటామని వారు చెప్పారు.

పురాతన విగ్రహం పోవడంతో గ్రామస్థులు ఆందోళన వ్యక్తం చేశారు. విగ్రహాన్ని వెంటనే కనిపెట్టి తీసుకురావాలని వారు పోలీసులను కోరారు.