హైదరాబాద్‌లో 20 వేల పిచ్చుకల పునరాగమనం: 'బ్రింగ్ బ్యాక్ స్పారోస్' ప్రచారం ఫలించింది

గత కొన్నేళ్లుగా హైదరాబాద్‌లో వేగవంతమైన అర్బనైజేషన్ కారణంగా పిచ్చుకల సంఖ్య గణనీయంగా తగ్గింది. ఈ నేపథ్యంలో EDWACS అనే సంస్థ 2016లో 'బ్రింగ్ బ్యాక్ స్పారోస్' (Bring Back Sparrows) అనే ప్రచార కార్యక్రమాన్ని ప్రారంభించింది. ఇందులో భాగంగా అమీర్‌పేట, గచ్చిబౌలి, దిల్‌సుఖ్‌నగర్ వంటి రద్దీ ప్రాంతాల్లో కృత్రిమంగా తయారు చేసిన గూళ్లను (నెస్ట్‌లు) ఉచితంగా అందజేశారు. నగర ప్రజల నుంచి కూడా ఈ కార్యక్రమానికి మంచి స్పందన లభించింది. ప్రజలు తమ ఇండ్ల వద్ద నీటి గిన్నెలు, గింజలు ఉంచడం ద్వారా పిచ్చుకలకు అనుకూల వాతావరణం కల్పించారు. దీంతో నగరంలో పిచ్చుకల సంఖ్య క్రమంగా పెరిగింది. తాజాగా జరిపిన ఒక సర్వే ప్రకారం నగరంలో సుమారు 20,000 పిచ్చుకలు నమోదైనట్లు తెలిసింది. పట్టణ ప్రాంతాల్లో అంతరించిపోతున్న పిచ్చుక జాతిని కాపాడేందుకు ఈ ప్రయత్నం విజయవంతమైన ఉదాహరణగా నిలిచింది.