నాగ్పూర్ ఇంట్లో 40 నాగుపాము పిల్లలు కనిపించాయి; తల్లిపాము కోసం గాలింపు

మహారాష్ట్రలోని నాగ్పూర్ జిల్లా రామ్‌టెక్ సమీపంలోని నెర్లా గ్రామంలో ఒక ఇంట్లో 40 నాగుపాము పిల్లలు కనిపించాయి. ఇంటి యజమాని రాజు, అతని కుటుంబం వాటిని చూసి భయపడ్డారు.

చుట్టుపక్కల వారికి సమాచారం ఇచ్చి స్నేక్ క్యాచర్‌కు కాల్ చేశారు. స్నేక్ క్యాచర్, అటవీ శాఖ సిబ్బంది ఘటనా స్థలానికి చేరుకుని అత్యంత జాగ్రత్తగా పాము పిల్లలన్నింటినీ బయటకు తీశారు.

పాము పిల్లలన్నీ పడగ విప్పి బుసలు కొడుతూ ఉన్నాయని స్థానికులు తెలిపారు. అన్నింటినీ ఒక గుట్టగా ఇంటి బయట చేర్చారు. తల్లి పాము మాత్రం ఇంకా ఆచూకీ లేదు. ఇంట్లో లేదా పరిసరాల్లో ఎక్కడో ఉండే అవకాశం ఉందని కుటుంబం ఆందోళన చెందుతోంది.

పాము పిల్లలను తొలగించినా, తల్లిపాము కోసం గాలింపు కొనసాగుతోంది. ఈ ఘటనతో గ్రామంలో భయం నెలకొంది.