HMDA చీఫ్ ఇంజనీర్ బచ్చు రవీందర్ ఇంట్లో ఏసీబీ సోదాలు, 12 ప్రాంతాల్లో తనిఖీలు

హైదరాబాద్ మహానగర అభివృద్ధి సంస్థ (HMDA) చీఫ్ ఇంజనీర్ బచ్చు రవీందర్‌పై అవినీతి నిరోధక శాఖ (ACB) ఆదాయానికి మించిన ఆస్తుల కేసులో దాడులు చేపట్టింది. హైదరాబాద్ సహా మొత్తం 12 ప్రాంతాల్లో ఏకకాలంలో సోదాలు జరుగుతున్నాయి.

ACB DSP మాజీద్ అలీ ఖాన్ నేతృత్వంలో ఉదయం 6 గంటల నుంచి ఈ తనిఖీలు కొనసాగుతున్నాయి. రవీందర్ నివాసం, కార్యాలయం, అతని బంధువులు, సన్నిహితుల ఇళ్లలోనూ సోదాలు నిర్వహించారు. ఆస్తి పత్రాలు, బ్యాంక్ లాకర్ వివరాలు, వెండి ఆభరణాలు, ఇతర కీలక పత్రాలు స్వాధీనం చేసుకున్నారు.

పలు జిల్లాల్లో రవీందర్ కొనుగోలు చేసిన భూములు, ఇళ్ల స్థలాల వివరాలతో పాటు ల్యాండ్ డాక్యుమెంట్లను కూడా ACB గుర్తించింది. అక్రమాస్తుల విలువ, వాటి మూలాలపై విచారణ కొనసాగుతోంది.

రవీందర్ గతంలో అదనపు ఆదాయం ద్వారా ఆస్తులు కూడబెట్టినట్లు వచ్చిన ఆరోపణలతో ACB కేసు నమోదు చేసింది. ఈ దాడులు రోజంతా కొనసాగే అవకాశం ఉంది. సోదాల అనంతరం కేసుకు సంబంధించిన పూర్తి వివరాలను ACB అధికారికంగా వెల్లడించనుంది.