పాతాళ భైరవి నటి కె. మాలతి హైదరాబాద్‌లో గోడ కూలి మృతి

1979లో హైదరాబాద్‌లో కాచిగూడ ప్రాంతంలో ప్రభాస్ థియేటర్ గోడ కూలిన ఘటనలో ఒక వృద్ధ మహిళ మరణించింది. ఆమె వద్ద లభించిన ట్రంక్ పెట్టెలోని ఫోటోలు, డైరీ ఆధారంగా ఆమె ప్రముఖ నటి కె. మాలతి అని తెలిసింది. 1940-50ల్లో తెలుగు, తమిళ, కన్నడ చిత్రాలలో నటించిన ఆమె, చివరి రోజుల్లో ఆర్థిక ఇబ్బందులతో గడిపారు.

కె. మాలతి ప్రస్తుత పశ్చిమ గోదావరి జిల్లా ఏలూరులో జన్మించారు. చిన్నతనంలోనే తండ్రి మరణించడంతో తల్లి ఆమెను చదువుతోపాటు నాట్యం, సంగీతం నేర్పించారు. నాటకాలపై ఆసక్తితో, ఆమె మోతే సంస్థలో చేరి అక్కడి వ్యక్తిని వివాహం చేసుకున్నారు. భర్త ప్రోత్సాహంతో మద్రాస్ (చెన్నై) చేరుకుని, హెచ్ఎంవీలో పాటలు పాడేవారు. 1939లో బి.ఎన్. రెడ్డి దర్శకత్వంలో 'ఉష' చిత్రంలో పార్వతీ దేవి పాత్రతో సినీ రంగ ప్రవేశం చేశారు.

'సుమంగళి' చిత్రంలో 'వస్తాడే మా బావ' పాటతో గుర్తింపు పొందారు. 1941లో భక్త పోతనలో శ్రీనాధుని కుమార్తెగా, 1944-47 మధ్య తమిళ చిత్రాల్లో నటించారు. ఎంజీఆర్ తొలి చిత్రం, కన్నడ నటుడు డాక్టర్ రాజ్‌కుమార్ తొలి చిత్రం 'శ్రీ కాళహస్తి మహత్యం'లో కూడా నటించారు. 1951లో కె.వి. రెడ్డి దర్శకత్వంలో వచ్చిన 'పాతాళ భైరవి' చిత్రంలో ఎన్టీఆర్ సరసన కథానాయికగా నటించారు. ఈ చిత్రం ఘన విజయం సాధించింది, హిందీ వెర్షన్‌కు స్వయంగా డబ్బింగ్ చెప్పారు.

అయితే, పాతాళ భైరవి విజయం తర్వాత మాలతికి అవకాశాలు తగ్గాయి. సుమారు మూడేళ్లు సినిమా అవకాశాలు లేక, 30 ఏళ్ల వయసులోనే తల్లి, అక్క పాత్రలు అడగడం మొదలైంది. దీంతో ఆమె కొన్నాళ్లు సినిమాలకు దూరంగా ఉన్నారు. భర్త మరణం తర్వాత కుటుంబ పోషణ కోసం చిన్న చిన్న పాత్రలు చేశారు. 1969లో హైదరాబాద్‌కు వచ్చి, కాచిగూడ ప్రభాస్ థియేటర్ పక్కన రేకుల షెడ్‌లో నివసించారు. ఆదాయం లేకపోవడంతో పక్కనే ఉన్న గుడి ప్రసాదంతో పొట్టపోషించుకునేవారు.

1979లో ఒక రోజు భారీ వర్షానికి ప్రభాస్ థియేటర్ గోడ కూలి, మాలతి నివసిస్తున్న షెడ్‌పై పడింది. ఈ ప్రమాదంలో ఆమె మరణించారు. పోలీసులు ఆమె వస్తువులను పరిశీలించగా, ట్రంక్‌లో ఉన్న ఫోటోలు, డైరీ ద్వారా ఆమె ఒకప్పటి ప్రముఖ నటి అని గుర్తించారు. ఆమె మరణించే వరకు స్థానికులెవరికీ ఆమె నేపథ్యం తెలియదు.