వివాదాల నేపథ్యంలో ఆదిలాబాద్ RIMS డైరెక్టర్ జైసింగ్ రాథోడ్ బదిలీ

ఆదిలాబాద్ RIMS డైరెక్టర్‌గా ఉన్న డాక్టర్ జైసింగ్ రాథోడ్‌ను తెలంగాణ ప్రభుత్వం బదిలీ చేసింది. ఆయన స్థానంలో డాక్టర్ బలరాం చిట్కేను RIMS డైరెక్టర్‌గా నియమిస్తూ ఉత్తర్వులు జారీ అయ్యాయి.

ప్రభుత్వ ప్రిన్సిపల్ సెక్రటరీ డాక్టర్ క్రిస్టినా ఈ ఉత్తర్వులు జారీ చేశారు. జైసింగ్ రాథోడ్‌ను నాగర్‌కర్నూల్ వైద్య కళాశాల ఇంచార్జ్ డైరెక్టర్‌గా బదిలీ చేశారు. ఆసిఫాబాద్ వైద్య కళాశాలలో ఆర్థోపెడిక్ ప్రొఫెసర్‌గా పనిచేస్తున్న డాక్టర్ వెంకట్ లకావత్‌ను RIMS సూపరింటెండెంట్‌గా నియమించారు.

ఆసుపత్రిపై వరుస వివాదాలు వచ్చిన నేపథ్యంలో ఈ బదిలీ జరిగింది. సెప్టెంబర్ 23న RIMS లోని నవజాత శిశు సంరక్షణ విభాగంలో అగ్ని ప్రమాదం సంభవించింది. ఈ ఘటనలో ఐదుగురు నవజాత శిశువులు మృతి చెందారు. ముగ్గురు సంఘటన స్థలంలోనే చనిపోగా, మరో ఇద్దరు చికిత్స పొందుతూ ప్రాణాలు కోల్పోయారు.

అక్టోబర్ 28న వైద్యుల నిర్లక్ష్యం వల్ల కవల పిల్లలు మరణించారంటూ బాధితులు ఆరోపించారు. అధికారిక నోటిఫికేషన్ లేకుండా, రిజర్వేషన్ నిబంధనలు ఉల్లంఘించి 11 అవుట్‌సోర్సింగ్ పోస్టులు భర్తీ చేశారని ఆరోపణలు వచ్చాయి. మహాలక్ష్మి మ్యాన్‌పవర్ అండ్ ప్లేస్‌మెంట్ సర్వీసెస్ ద్వారా ఈ నియామకాలు జరిగినట్టు ఆరోపణలు వెలుగులోకి వచ్చాయి. జిల్లా కలెక్టర్ ఆదేశాల మేరకు ఆ నియామకాలు రద్దు అయ్యాయి.

రికార్డులో ఉన్న 70 మంది సిబ్బంది జాడ లేదని కూడా ఆరోపణలు వచ్చాయి. రెండు వార్డుల నుంచి నాలుగు వెంటిలేటర్లు దొంగతనం జరిగాయి. వాటి విలువ సుమారు ₹35 లక్షలు ఉంటుందని తెలిపారు. ఆసుపత్రిలో లైంగిక వేధింపుల ఆరోపణలు కూడా వచ్చాయి. రాత్రి విధుల్లో ఉండే మహిళా సిబ్బంది, విద్యార్థుల భద్రతపై ఆందోళన వ్యక్తం చేస్తూ వారు ధర్నా చేశారు.

కొత్త డైరెక్టర్ బాధ్యతలు స్వీకరించాక ఆసుపత్రిలో మౌలిక సదుపాయాలు మెరుగుపరచాలని స్థానికులు కోరుతున్నారు.