పటాన్చెరులో డిసెంబర్ 12న అద్వైత సంగమం; 18 వేల మందితో కోటి నామార్చన

అద్వైత సంగమం 2026 కార్యక్రమం డిసెంబర్ 12న పటాన్చెరులోని GMR కన్వెన్షన్ గ్రౌండ్‌లో జరగనుంది. ఈ కార్యక్రమంలో 18 వేల మంది అయ్యప్ప స్వాములు కలిసి కోటి నామార్చన చేయనున్నారు.

నిర్వాహకుల లెక్కల ప్రకారం, ఒక స్వామి నిమిషానికి ఐదు సార్లు మహామంత్రం జపిస్తారు. 18 వేల మంది ఒక గంటలో 54 లక్షల సార్లు జపం చేయగలరు. రెండు గంటల్లో ఇది ఒక కోటి దాటుతుంది. ఈ కార్యక్రమాన్ని 'లార్జెస్ట్ సింక్రొనైజ్డ్ అయ్యప్ప మహామంత్రం' పేరుతో గిన్నెస్ వరల్డ్ రికార్డు నమోదు లక్ష్యంగా నిర్వహిస్తున్నట్టు నిర్వాహకులు తెలిపారు.

కార్యక్రమానికి ముందు నవంబర్ 21న కామారెడ్డిలోని అయ్యప్ప దేవాలయం నుంచి రథయాత్ర ప్రారంభమవుతుంది. తెలంగాణలోని అయ్యప్ప దేవాలయాలను అనుసంధానం చేస్తూ ఈ యాత్ర డిసెంబర్ 11 వరకు కొనసాగుతుంది. తెలంగాణలో 400కు పైగా అయ్యప్ప దేవాలయాలు ఉన్నాయని, వాటిలో 300 వరకు ఇప్పటికే కార్యక్రమంలో చేరాయని నిర్వాహకులు చెప్పారు. ఈ కాలంలో దాదాపు లక్షా 20 వేల మందిని కార్యక్రమంతో అనుసంధానం చేయాలని లక్ష్యంగా పెట్టుకున్నారు.

డిసెంబర్ 12న ఉదయం 6 నుంచి 10 గంటల మధ్య క్యూఆర్ కోడ్ ద్వారా ప్రవేశం ఉంటుంది. ఉదయం గణపతి హోమం, శంకర శాస్త్రీయ పూజ జరుగుతాయి. 9 గంటలకు ప్రారంభోత్సవం, ఆ తర్వాత అద్వైత సభ నిర్వహిస్తారు. 10:30 గంటలకు మంత్రోపదేశం అనంతరం రెండు గంటల పాటు కోటి నామార్చన కొనసాగుతుంది. మధ్యాహ్నం దాదాపు 60 వేల మందికి అన్నదానం ఏర్పాటు చేస్తున్నారు. సాయంత్రం 4 గంటలకు 10 వేల మంది మహిళలతో కోటి కుంకుమార్చన జరుగుతుంది. శృంగేరి శారదా పీఠం ఆదేశం మేరకు ఈ కుంకుమార్చన నిర్వహిస్తున్నట్టు నిర్వాహకులు తెలిపారు. విజయోత్సవం, హరివరాసనంతో సాయంత్రం 7 గంటలకు కార్యక్రమం ముగుస్తుంది.

కార్యక్రమంలో పాల్గొనేందుకు వెబ్సైట్ ద్వారా ఉచిత రిజిస్ట్రేషన్ చేసుకోవాలి. దీక్ష తీసుకున్న స్వాములు నామార్చనకు, మహిళలు కుంకుమార్చనకు, సేవ చేయాలనుకునే వారు సేవాదళ్‌కు, దర్శనానికి వచ్చే వారు ప్రత్యేకంగా రిజిస్టర్ చేసుకోవచ్చు. డిసెంబర్ 5లోపు రిజిస్ట్రేషన్ ముగించాలని నిర్వాహకులు తెలిపారు. రిజిస్టర్ చేసుకున్న వారికి వెంటనే ID కార్డు జారీ అవుతుంది. 60 ఏళ్లు దాటిన వారికి కుర్చీలు, మహిళలకు కూర్చునే సౌకర్యం కల్పిస్తున్నారు. సేవాదళ్ కోసం దాదాపు 5 వేల మంది వాలంటీర్లు అవసరమని నిర్వాహకులు చెప్పారు. పాల్గొన్న వారు డిసెంబర్ 13 నుంచి వెబ్సైట్‌లో లాగిన్ అయి సర్టిఫికెట్ డౌన్‌లోడ్ చేసుకోవచ్చు.