ఎయిర్ ఇండియా విమానంలో టర్బులెన్స్: డజన్ల మందికి గాయాలు, ఢిల్లీ విమానాశ్రయంలో అయోమయం

Phuket నుంచి ఢిల్లీకి వస్తున్న ఒక Air India విమానం మధ్యాకాశంలో తీవ్ర టర్బులెన్స్ కు గురై పలువురు ప్రయాణికులు గాయపడ్డారు. గాయపడిన వారిలో ఒక వృద్ధ మహిళకు పక్కటెముక విరిగింది. విమానం ఢిల్లీ విమానాశ్రయంలో ల్యాండ్ అయిన తర్వాత అత్యవసర వైద్య సేవలు లేకపోవడంతో గంటకు పైగా అయోమయ పరిస్థితి నెలకొందని ఆమె కుటుంబ సభ్యుడు ఆరోపించారు.

ఆ కుటుంబ సభ్యుడు ఎయిర్ ఇండియా, విమానాశ్రయ అధికారులపై తీవ్ర అసంతృప్తి వ్యక్తం చేశారు. 'ఫ్లైట్ లో టర్బులెన్స్ వల్ల సీట్ బెల్ట్ పెట్టుకోని వారంతా పైకి ఎగిరి సీలింగ్ కు తగిలి గాయపడ్డారు. సీట్ బెల్ట్ ఉన్నా నా అత్తమ్మకు సైడ్ హ్యాండిల్ పట్టుకోవడం వల్ల పక్కటెముక విరిగింది. గాయపడిన వారి సంఖ్య 5, 10, 17 మాత్రమే కాదు, చాలా ఎక్కువ. కానీ ఖచ్చితమైన లెక్క లేదు' అని ఆయన వివరించారు.

విమానం కిందకు దిగిన ఒకటిన్నర గంటల తర్వాత కూడా ఎయిర్‌పోర్టులో ఎలాంటి ఏర్పాట్లు కనిపించలేదు. వీల్‌చైర్ సిబ్బందికి కూడా ఎక్కడికి తీసుకెళ్లాలో తెలియలేదు. వారు గాయపడిన వారిని ఇమ్మిగ్రేషన్ వైపు తీసుకెళ్తుండగా, హాస్పిటల్ కు తీసుకెళ్లాలని బాధిత కుటుంబం అరిచి చెప్పాల్సి వచ్చింది. 'ఎయిర్ ఇండియా సీనియర్ స్టాఫ్, ఎయిర్‌పోర్ట్ సీనియర్ స్టాఫ్ ఎవరూ లేరు. అంబులెన్స్ ముందస్తు ఏర్పాటు లేదు, నీళ్లు కూడా అడిగితే గానీ ఇవ్వలేదు' అని ఆయన ఆవేదన వ్యక్తం చేశారు.

సుమారు గంట తర్వాత టర్మినల్ 3 హెడ్ రవిశంకర్ గౌర్ వచ్చిన తర్వాతే కొంత సహాయం లభించింది. ఆయన జోక్యంతో అంబులెన్స్ ఏర్పాటు చేసి హాస్పిటల్ కు తరలించారు. కానీ అప్పటికే ఒక గంట ఆలస్యమైంది. 'ఎయిర్‌పోర్ట్‌లో ఎమర్జెన్సీ SOP యాక్టివేట్ కాలేదు. 50-60 మంది సిబ్బంది నిలబడి చూస్తూనే ఉన్నారు గానీ ఎవరూ సాయం చేయలేదు' అని ఆ కుటుంబ సభ్యుడు తెలిపారు.

అయితే ఈ ప్రమాదం పైలట్ నిర్లక్ష్యమా లేదా సహజ కారణమా అనేది తాము చెప్పలేమని, చాలావరకు ఇది సహజ వాతావరణ కారణమే అయ్యుండొచ్చునని ఆయన అభిప్రాయపడ్డారు. అసలు సమస్య ప్రయాణికులను ఆదుకోవడంలో ఎదురైన నిర్వహణ లోపమేనని ఆయన స్పష్టం చేశారు.