రొటేటర్ కఫ్ సమస్య: కారణాలు, చికిత్స, జాగ్రత్తలపై డాక్టర్ అఖిలా సుందర్ వివరణ

భుజానికి సంబంధించిన రొటేటర్ కఫ్ సమస్య ఇటీవల చాలా మందిలో కనిపిస్తోంది. ఏపీ డిప్యూటీ సీఎం పవన్ కల్యాణ్ కూడా ఈ సమస్యతో బాధపడుతున్నారు. సీనియర్ ఆర్థోపెడిక్ సర్జన్ డాక్టర్ అఖిలా సుందర్ ఈ వ్యాధి గురించి వివరించారు.

రొటేటర్ కఫ్ అంటే భుజం చుట్టూ ఉండే నాలుగు కండరాలు. ఇవి చేయి పైకెత్తడం, ముందుకు వెనక్కు తిప్పడం వంటి భుజం కదలికలకు సహాయపడతాయి. స్పోర్ట్స్ ఇంజురీ, రోడ్డు ప్రమాదాలు, జిమ్‌లో సరైన టెక్నిక్ లేకుండా బరువులు ఎత్తడం వంటి కారణాలతో యువతలో ఈ కండరాలు తెగే అవకాశం ఉంటుంది. 50–60 ఏండ్లు పైబడిన వారిలో కండరంలో కొవ్వు పెరిగి కండ క్షీణించడం వల్ల చిన్న కదలికలకే తెగే ప్రమాదం ఉందని డాక్టర్ అఖిలా తెలిపారు.

లక్షణాలు: భుజం నొప్పి, చెయ్యి లేపడంలో ఇబ్బంది, రాత్రిపూట నొప్పి వస్తుంది. మూడు వారాలకు మించి నొప్పి ఉంటే డాక్టర్‌ను సంప్రదించాలి. ఎంఆర్ఐ స్కానింగ్ ద్వారా కండరం తెగిన కొలత తెలుస్తుంది.

చికిత్స: కండరం కొంత భాగం తెగితే మందులు, విశ్రాంతి, ఫిజియోథెరపీ వ్యాయామాలతో తగ్గే అవకాశం ఉంది. పూర్తిగా తెగిపోతే, నొప్పి తగ్గకపోతే కీహోల్ సర్జరీ (ఆర్థ్రోస్కోపీ) చేస్తారు. ఇది చిన్న ప్రక్రియ; రెండు మూడు చిన్న రంధ్రాల ద్వారా కండరాన్ని రిపేర్ చేస్తారు. సర్జరీ తర్వాత 4–6 వారాలు బ్యాగ్ సపోర్ట్ ఇస్తారు. ఫిజియోథెరపీతో సాధారణ కార్యకలాపాలు 3 నెలల్లో, స్పోర్ట్స్ ఆరు నెలల తర్వాత చేయవచ్చు.

చిన్న సమస్యను నిర్లక్ష్యం చేస్తే కండరం పూర్తిగా క్షీణించి రిపేర్ చేయలేని స్థితికి చేరుతుందని డాక్టర్ హెచ్చరించారు. నిత్యం ఫిట్‌నెస్, భుజాల వ్యాయామాలు చేయాలి. ప్రోటీన్ తగినంతగా తీసుకోవాలి. డెస్క్ వర్క్ చేసేవారు తరచుగా విరామం తీసుకొని స్ట్రెచింగ్ చేయాలి.