జాతీయ పతాకం చిత్రంలో అశోక చక్రం లేదని అభ్యంతరాలు; అల్లు అర్జున్ పోస్ట్ తొలగించారు

స్వాతంత్ర దినోత్సవ సందర్భంగా నటుడు అల్లు అర్జున్ సోషల్ మీడియాలో పెట్టిన పోస్టులోని జాతీయ పతాకం చిత్రంపై అభ్యంతరాలు వచ్చాయి. ఆ చిత్రంలో అశోక చక్రం లేదని సోషల్ మీడియా యూజర్లు గుర్తించారు.

అల్లు అర్జున్ ఎర్రకోటపై జాతీయ జెండా ఎగురుతున్న గ్రాఫిక్ ఇమేజ్ను పోస్ట్ చేశారు. జెండా మధ్యలో ఉండాల్సిన అశోక చక్రం ఆ చిత్రంలో కనిపించలేదని యూజర్లు అభ్యంతరం తెలిపారు. పోస్టులో కొన్ని లోగోలు స్పష్టంగా కనిపించడంపైనా కొందరు అసంతృప్తి వ్యక్తం చేశారు.

విమర్శలు రావడంతో అల్లు అర్జున్ ఆ పోస్టును తన సోషల్ మీడియా అకౌంట్ నుంచి తొలగించారు. ప్రస్తుతం ఆ పోస్ట్ అందుబాటులో లేదు.

కొందరు యూజర్లు ఇది గ్రాఫిక్ డిజైన్ పొరపాటేనని, కావాలని చేసినది కాదని అభిప్రాయపడ్డారు. జాతీయ జెండా విషయంలో సెలబ్రిటీలు మరింత జాగ్రత్తగా ఉండాలని మరికొందరు అన్నారు. సోషల్ మీడియా పేజీలను ప్రత్యేక బృందాలు నిర్వహిస్తాయని, హడావిడిలో ఇలాంటి డిజైన్ లోపాలు జరిగే అవకాశం ఉందని వివరణ వచ్చింది.