అమితాబ్ బచ్చన్ జల్సా బంగ్లాపై ఆస్తి వివాదం.. రమోల ఆరోపణలు

ముంబై జుహులోని అమితాబ్ బచ్చన్ బంగ్లా 'జల్సా' ఇప్పుడు ఆస్తి వివాదంలో నిలిచింది. ఈ భవంతిపై ఆయన సోదరుడు అజితాబ్ బచ్చన్ భార్య రమోల ఆరోపణలు చేస్తున్నారు.

1993లో జల్సాను అమితాబ్ బచ్చన్ తన భార్య జయా బచ్చన్ పేరిట బదిలీ చేశారు. ఈ లావాదేవీ గురించి తనకు ఎలాంటి సమాచారం లేదని రమోల చెప్తున్నారు. తన అనుమతి లేకుండా గిఫ్ట్ డీడ్ ద్వారా ఇంటిని జయా బచ్చన్ పేరిట చేసుకోవడాన్ని ఆమె ప్రశ్నిస్తున్నారు.

ఈ విషయంపై రమోల రిజిస్ట్రేషన్ అధికారులకు పలుమార్లు ఫిర్యాదు చేసినట్టు సమాచారం. తొలుత ఈ ప్రాపర్టీ రమోల పేరిట ఉండగా, గిఫ్ట్ ద్వారా యాజమాన్య హక్కులు జయా బచ్చన్‌కు బదిలీ అయినట్టు తెలుస్తోంది.

హౌసింగ్ సొసైటీ రికార్డుల్లో జయా బచ్చన్ పేరు ఉండగా, ప్రభుత్వ రికార్డుల్లో మాత్రం రమోల పేరు కొనసాగుతున్నట్టు తెలుస్తోంది. 1982లో ఓ సినిమా రెమ్యునరేషన్‌కు బదులుగా ఈ భవంతిని అమితాబ్ బచ్చన్ ఒక నిర్మాత నుంచి కొనుగోలు చేసినట్టు సమాచారం.

దాదాపు నాలుగు దశాబ్దాలుగా ప్రతి ఆదివారం ఈ భవంతి ప్రాంగణం నుంచి అభిమానులను పలకరించడం అమితాబ్ బచ్చన్‌కు అలవాటుగా మారింది. ఈ వివాదంపై అమితాబ్ బచ్చన్, జయా బచ్చన్ వైపు నుంచి స్పందన లభ్యం కాలేదు.