రాష్ట్రానికి రెండు ప్రధాన సమస్యలు ఉన్నాయని సీఎం చంద్రబాబు వెల్లడి

తీర ప్రాంతంలో తుఫానులు, రాయలసీమలో కరువు — ఇవే రాష్ట్రానికి ఎదురవుతున్న రెండు ప్రధాన సమస్యలని ముఖ్యమంత్రి చంద్రబాబు నాయుడు అన్నారు. తుఫాన్ల నేపథ్యంలో వర్షపాతం, రిజర్వాయర్ల నీటి నిల్వలపై ఆయన మాట్లాడారు.

రెండు తుఫాన్ల వల్ల రాష్ట్రానికి ఇప్పటివరకు 694 టీఎంసీ వర్షపు నీరు వచ్చింది. ఇందులో 504 టీఎంసీ ఇప్పటికే నమోదు కాగా, మరో 150 టీఎంసీ రాబోయే రెండు రోజుల్లో వచ్చే అవకాశం ఉందని ఆయన తెలిపారు. ఈరోజు ఒక్కరోజే రిజర్వాయర్లకు 11 టీఎంసీ నీరు చేరింది.

ఈ 694 టీఎంసీలో 369 టీఎంసీ నీరు భూగర్భజలాలు, నేల తేమ, సాగునీటి రూపంలో నిలిచింది. ఇది భవిష్యత్తులో ఉపయోగపడుతుందని చంద్రబాబు చెప్పారు.

అయినా రాష్ట్రంలో వర్షపాతం ఇంకా 27-28 శాతం లోటులో ఉంది. రాయలసీమలో 30 నుంచి 50 శాతం వరకు లోటు ఉందని ఆయన తెలిపారు.

తుఫాన్ల సమయంలో అధికార యంత్రాంగం సన్నద్ధతతో ముందస్తు జాగ్రత్తలు తీసుకుందని చంద్రబాబు అన్నారు. దీని వల్ల విపత్తు ప్రభావం గణనీయంగా తగ్గిందని ఆయన చెప్పారు. విపత్తును పూర్తిగా ఆపలేకపోయినా, నష్టాన్ని తగ్గించగలిగామని ఆయన తెలిపారు.

కరువును ఎదుర్కోవడానికి 35 ప్రాజెక్టులపై ₹36,000 కోట్లు ఖర్చు చేయాలని ఆయన అన్నారు. పోలవరం ప్రాజెక్టును పూర్తి చేయాల్సిన అవసరం ఉందని చంద్రబాబు పేర్కొన్నారు.