సల్మాన్ ఖాన్ ఇంటి కాల్పుల కేసులో లారెన్స్ బిష్ణోయ్ తమ్ముడు అన్మోల్ బిష్ణోయ్ సరెండర్‌కు దరఖాస్తు

బాలీవుడ్ నటుడు సల్మాన్ ఖాన్ నివాసంపై 2024 ఏప్రిల్‌లో జరిగిన కాల్పుల కేసులో వాంటెడ్ నిందితుడు అన్మోల్ బిష్ణోయ్ కోర్టులో సరెండర్ కావడానికి అనుమతి కోరాడు. జైలులో ఉన్న గ్యాంగ్‌స్టర్ లారెన్స్ బిష్ణోయ్ తమ్ముడైన అన్మోల్, ముంబైలోని ప్రత్యేక MCOCA కోర్టు ముందు అధికారికంగా లొంగిపోయేందుకు దరఖాస్తు చేశాడు. ప్రస్తుతం ఢిల్లీలోని తీహార్ జైలులో ఉన్న అన్మోల్, ఈ కేసులో న్యాయమైన విచారణ, న్యాయ ప్రక్రియలో పాల్గొనడానికి స్వచ్ఛందంగా సరెండర్ కావాలని తన దరఖాస్తులో పేర్కొన్నాడు.

ఏప్రిల్ 2024లో బాంద్రాలోని సల్మాన్ ఖాన్ ఇంటి బయట గుర్తు తెలియని వ్యక్తులు కాల్పులు జరిపిన సంగతి తెలిసిందే. ఈ కేసులో అన్మోల్ ప్రధాన నిందితుడిగా ఉన్నాడు. అతడిని అమెరికా నుంచి నవంబర్ 2025లో భారత్‌కు ఎక్స్‌ట్రాడిట్ చేయగా, వెంటనే నేషనల్ ఇన్వెస్టిగేటివ్ ఏజెన్సీ (NIA) లారెన్స్ బిష్ణోయ్ గ్యాంగ్‌తో సంబంధం ఉన్న టెర్రర్-గ్యాంగ్‌స్టర్ కేసులో అరెస్ట్ చేసింది. ప్రస్తుతం తీహార్ జైలులో కఠిన భద్రతా విభాగంలో ఉన్నాడు.

గురువారం స్పెషల్ జడ్జి ఎస్.ఆర్. నవందర్ అన్మోల్ దరఖాస్తుపై పబ్లిక్ ప్రాసిక్యూటర్ స్పందించాలని ఆదేశించారు. న్యాయవాదుల సలహాతో అన్మోల్ ఈ మార్గాన్ని ఎంచుకున్నట్టు విశ్లేషకులు అభిప్రాయపడుతున్నారు. నిందితుడు ముంబై కోర్టుకు హాజరు కాకుండా వీడియో కాన్ఫరెన్స్ ద్వారా విచారణను ఎదుర్కొనే అవకాశం ఉంది. గతంలో ముంబై కోర్టు ఛోటా రాజన్ కేసులో ఇలాగే తీర్పు ఇచ్చింది.

కోర్టు తదుపరి విచారణలో ప్రాసిక్యూషన్ అభ్యంతరాలు, అన్మోల్ సరెండర్ పిటీషన్‌పై నిర్ణయం తీసుకోనుంది. ఈ పరిణామం సల్మాన్ ఖాన్ కాల్పుల కేసు దర్యాప్తు మరింత వేగవంతం చేయడంతో పాటు లారెన్స్ బిష్ణోయ్ గ్యాంగ్ నెట్‌వర్క్‌పై అంతర్జాతీయ విచారణకు దారి తీయొచ్చని న్యాయ నిపుణులు చెప్తున్నారు.