గగనయాన్ దిశగా మరో ముందడుగు: ISRO పారాచూట్ పరీక్ష విజయవంతం

భారత తొలి మానవ అంతరిక్ష యాత్ర గగనయాన్ మిషన్‌లో మరో కీలక ఘట్టం పూర్తయింది. వ్యోమగాములు ప్రయాణించే క్రూ క్యాప్సూల్‌ను అంతరిక్షం నుంచి సురక్షితంగా భూమిపైకి తీసుకొచ్చేందుకు అవసరమైన ప్రధాన పారాచూట్ వ్యవస్థను ISRO విజయవంతంగా పరీక్షించింది.

మధ్యప్రదేశ్‌లోని షియోపూర్‌లో ఉన్న ఏరియల్ డెలివరీ రీసెర్చ్ అండ్ డెవలప్‌మెంట్ ఎస్టాబ్లిష్‌మెంట్ డ్రాప్ జోన్‌లో ఈ పరీక్ష నిర్వహించారు. దీనిని ఇంటిగ్రేటెడ్ మెయిన్ పారాచూట్ ఎయిర్ డ్రాప్ టెస్ట్‌గా ISRO పేర్కొంది.

గగనయాన్ క్రూ మాడ్యూల్‌లో మొత్తం పది పారాచూట్లు ఉంటాయి. ఇవి నాలుగు రకాలుగా పనిచేస్తాయి. మొదట రెండు అపెక్స్ కవర్ సెపరేషన్ పారాచూట్లు రక్షణ కవర్‌ను తొలగిస్తాయి. తర్వాత రెండు డ్రోగ్ పారాచూట్లు క్యాప్సూల్‌ను స్థిరపరిచి వేగాన్ని తగ్గిస్తాయి. ఆ తర్వాత మూడు పైలట్ పారాచూట్లు పనిచేసి మూడు ప్రధాన పారాచూట్లను తెరుస్తాయి. చివరిగా ఈ ప్రధాన పారాచూట్లు క్యాప్సూల్ వేగాన్ని భారీగా తగ్గించి సముద్రంలో సురక్షితంగా దిగేలా చేస్తాయి.

తాజా పరీక్షలో భారత వైమానిక దళానికి చెందిన IL-76 విమానం నుంచి సుమారు రెండున్నర కిలోమీటర్ల ఎత్తు నుంచి డమ్మీ బరువుతో కూడిన ప్రధాన పారాచూట్ వ్యవస్థను వదిలారు. ISRO, DRDO, భారత వైమానిక దళం మరియు భారత సైన్యం సంయుక్తంగా ఈ పరీక్షలు నిర్వహించాయి.

గగనయాన్ తొలి మానవ రహిత ప్రయోగమైన G1 మిషన్‌లో ఎదురయ్యే అత్యధిక ఒత్తిడి పరిస్థితుల్లో కూడా ప్రధాన పారాచూట్ సమర్థవంతంగా పనిచేస్తుందో లేదో నిర్ధారించడమే ఈ పరీక్ష లక్ష్యమని ISRO తెలిపింది. ఈ పరీక్ష విజయవంతం కావడంతో పారాచూట్ వ్యవస్థ పనితీరుపై మరింత విశ్వాసం పెరిగిందని వెల్లడించింది.