సోషల్ మీడియా అబ్యూస్: కఠిన చర్యలు తప్పవని ఏపీ సైబర్ క్రైమ్ ఐజి రవికృష్ణ హెచ్చరిక

ఏపీ సైబర్ క్రైమ్ ఐజి రవికృష్ణ సోషల్ మీడియా దుర్వినియోగంపై తీవ్ర హెచ్చరికలు చేశారు. ఎవరైనా సోషల్ మీడియా వేదికగా అసభ్యకర పోస్టులు చేస్తే, పరిధి దాటి వ్యక్తిగత దాడులు చేస్తే కఠిన చర్యలు తప్పవని ఆయన స్పష్టం చేశారు. ఇటీవల శ్రీరాముడిని దూషించడంతోపాటు మావో భావజాలానికి మద్దతు పలికే వీడియోలు కారణంగా కృష్ణా జిల్లాలో అరెస్టు అయిన వ్యక్తి కేసు ఒక ఉదాహరణగా నిలుస్తుందని ఆయన పేర్కొన్నారు.

రాజకీయ పార్టీలు సోషల్ మీడియా నియంత్రణ కోసం ప్రత్యేక ఎథిక్స్ కమిటీలను ఏర్పాటు చేసుకోవాలని సూచించారు. పార్టీ కార్యకర్తలు అసభ్యకర కామెంట్లు చేస్తే వారిని పార్టీ సమర్థించకూడదని, లేదంటే ఆ ప్రవర్తన మరింత రెచ్చగా మారుతుందని హెచ్చరించారు. ఈ వివాదాలన్నీ రాజకీయ పార్టీల విమర్శల సంస్కృతి పరిధి దాటడం వల్లే వెలుగులోకి వచ్చాయన్నారు.

రాష్ట్ర ప్రభుత్వం సోషల్ మీడియా అబ్యూస్ పై చాలా సీరియస్‌గా ఉందని, త్వరలో స్టేట్ లెవెల్ సోషల్ మీడియా రెస్పాన్సబిలిటీ కమిటీ, సైబర్ టాస్క్ ఫోర్స్, సైబర్ వార్ రూమ్, సైబర్ గార్డ్ వంటివి అందుబాటులోకి వస్తాయని తెలిపారు. డిజిపి మార్గదర్శకత్వంలో ఈ ఏర్పాట్లు జరుగుతాయి.

ఆన్లైన్ అబ్యూస్ నియంత్రణ కోసం కేంద్రం ఒక గ్రూప్ ఆఫ్ మినిస్టర్స్‌ను ఏర్పాటు చేసింది. సింగపూర్, యూకే, ఆస్ట్రేలియా, యూరోపియన్ యూనియన్ దేశాల చట్టాలను అధ్యయనం చేస్తున్నారు. ఐటి చట్టం ప్రకారం ప్రస్తుతం మూడు నుంచి ఏడేళ్ల శిక్ష మాత్రమే ఉంది. ఈ శిక్షను పెంచడం, కొత్త చట్టాలు తేవడం వంటి అంశాలపై ఈ కమిటీ నిర్ణయాలు తీసుకుంటుంది. ఇప్పటికే మూడు సమావేశాలు పూర్తయ్యాయి.

యువతీ యువకులకు పెద్ద హెచ్చరిక చేస్తూ, డిజిటల్ స్పేస్‌లో ప్రతి చర్య రికార్డు అవుతుందని, అబ్యూసివ్ కంటెంట్ పోస్ట్ చేస్తే భవిష్యత్తు నాశనం చేసుకుంటారని సైబర్ క్రైమ్ ఐజి రవికృష్ణ స్పష్టం చేశారు. రాష్ట్ర ప్రభుత్వం, సైబర్ క్రైమ్ డిపార్ట్మెంట్ ఈ దిశగా పూర్తి ఫోకస్ పెట్టిందని, ఉల్లంఘించిన వారిని ఏమాత్రం ఉపేక్షించబోమని ఆయన హెచ్చరించారు.