సింగిల్ స్క్రీన్ థియేటర్లకు సోలార్ విద్యుత్: 80% రుణం ఇవ్వడానికి ప్రైవేట్ బ్యాంకులు సిద్ధం

సింగిల్ స్క్రీన్ సినిమా థియేటర్ల నిర్వహణ భారం తగ్గించేందుకు ఏపీ ఫిలిం ఛాంబర్ ఆఫ్ కామర్స్ సోలార్ విద్యుత్ వ్యవస్థల ఏర్పాటుకు అండగా నిలుస్తోంది.

థియేటర్లలో విద్యుత్ వ్యయం ఎక్కువగా ఉండడంతో, సోలార్ యూనిట్లు అమర్చుకోవాలని ఛాంబర్ సూచిస్తోంది. ఒక్కో థియేటర్‌లో సోలార్ పవర్ యూనిట్ ఏర్పాటుకు అయ్యే మొత్తం ఖర్చులో 80% వరకు రుణం ఇచ్చేందుకు ప్రైవేట్ బ్యాంకులు ముందుకు వచ్చాయని, ఈ రుణాల మంజూరు ప్రక్రియలో చాంబర్ తరఫున సాయం చేస్తామని ఛాంబర్ ప్రతినిధులు తెలిపారు.

ఆంధ్రప్రదేశ్‌లో 716 సింగిల్ స్క్రీన్ థియేటర్లు ఉండగా, తెలంగాణలో దాదాపు 300 థియేటర్లు ఉన్నాయి. నిర్వహణ ఖర్చులు పెరగడంతో చాలా థియేటర్లు ఇబ్బందులు ఎదుర్కొంటున్నాయని, అందుకే సోలార్ విధానం వైపు మళ్లాల్సిన అవసరం ఉందని ఛాంబర్ పేర్కొంది.

సోలార్ ఏర్పాటును ప్రోత్సహించేలా, ప్రభుత్వం థియేటర్లకు సంబంధించిన వాణిజ్య కేటగిరీ నిబంధనలను సడలించి రాయితీలు కల్పించాలని ఛాంబర్ విజ్ఞప్తి చేసింది. త్వరలోనే ఈ దిశగా ప్రభుత్వంతో చర్చలు జరపనున్నట్లు ఛాంబర్ వర్గాలు తెలిపాయి.