ఏపీలో గ్రామ పంచాయతీ ఎన్నికలు మూడు విడతలుగా.. నవంబర్ 26 నుంచి పోలింగ్

ఆంధ్రప్రదేశ్‌లో గ్రామ పంచాయతీ ఎన్నికల షెడ్యూల్‌పై రాష్ట్ర ఎన్నికల సంఘం కసరత్తు చేస్తోంది. మూడు విడతల్లో ఎన్నికలు నిర్వహించాలని ఎన్నికల సంఘం ప్రణాళిక రూపొందించినట్టు సమాచారం.

తొలి విడత నోటిఫికేషన్ నవంబర్ 13న విడుదలయ్యే అవకాశం ఉంది. రెండో విడత నోటిఫికేషన్ నవంబర్ 16న, మూడో విడత నోటిఫికేషన్ నవంబర్ 19న విడుదల కానున్నట్టు తెలుస్తోంది. పోలింగ్ నవంబర్ 26, నవంబర్ 29, డిసెంబర్ 2 తేదీల్లో జరగనుంది. పోలింగ్ ముగిసిన రోజే ఓట్ల లెక్కింపు చేపట్టి ఫలితాలు ప్రకటించాలని ఎన్నికల సంఘం భావిస్తోంది.

సర్పంచ్, వార్డు సభ్యుల స్థానాలకు ఈ ఎన్నికలు జరుగుతాయి. నోటిఫికేషన్ తర్వాత నామినేషన్ల స్వీకరణ, పరిశీలన, ఉపసంహరణ ప్రక్రియ పూర్తి చేసి తుది జాబితా విడుదల చేస్తారు. ప్రతి గ్రామంలోనే పోలింగ్ కేంద్రాలు ఏర్పాటు చేయాలని నిర్ణయించారు.

ఇప్పటికే జిల్లా పరిషత్, మండల పరిషత్ ఎన్నికలు, పట్టణ స్థానిక సంస్థల ఎన్నికలు పూర్తయ్యాయి. ఈ నేపథ్యంలో గ్రామ పంచాయతీ ఎన్నికలకు ఎన్నికల సంఘం సిద్ధమైంది. ఏకగ్రీవంగా ఎన్నికయ్యే పంచాయతీలపై ప్రత్యేక దృష్టి పెట్టింది. సమస్యాత్మక గ్రామాలను గుర్తించి అక్కడ అదనపు పోలీసు బలగాలు, కట్టుదిట్టమైన బందోబస్తు ఏర్పాటు చేస్తున్నారు.

గతంలో జరిగిన స్థానిక సంస్థల ఎన్నికల్లో నామినేషన్ల దశలో పలు చోట్ల హింసాత్మక ఘటనలు జరిగాయి. ఈ నేపథ్యంలో అసాంఘిక శక్తులపై పోలీస్ యంత్రాంగం కఠిన చర్యలు తీసుకున్నట్టు సమాచారం ఉంది. 20 వేల మందికి పైగా అసాంఘిక శక్తులపై చర్యలు తీసుకున్నట్టు తెలుస్తోంది.

ఎన్నికల నోటిఫికేషన్ విడుదలకు మూడు రోజుల సమయం మాత్రమే మిగిలింది. అభ్యర్థుల ఎంపికపై అన్ని పార్టీలు కసరత్తు చేస్తున్నాయి. వార్డు నుంచి సర్పంచ్ స్థానం వరకు పోటీకి ఎక్కువ మంది ఆసక్తి చూపుతున్నట్టు తెలుస్తోంది.