ఏపీలో రూ.71,602 కోట్ల పెట్టుబడి ప్రతిపాదనలు: విశాఖలో డేటా సెంటర్, తిరుపతిలో లిథియం బ్యాటరీ తయారీకి ప్రాధాన్యం

రాష్ట్రంలో పారిశ్రామిక ప్రగతికి కొత్త ప్రతిపాదనలు వస్తున్నాయి. వివిధ సంస్థల నుంచి రూ.71,602.60 కోట్ల పెట్టుబడి ప్రతిపాదనలు ప్రభుత్వానికి అందాయి. ఈ పెట్టుబడుల ద్వారా 14,190 మందికి ఉద్యోగ అవకాశాలు లభించనున్నాయి.

విశాఖపట్నంలో డేటా సెంటర్ హోల్డింగ్స్ ఇండియా ఎల్ఎల్పి రూ.58,743 కోట్లతో భారీ డేటా సెంటర్ ఏర్పాటు చేయనుంది. రాబోయే 10 సంవత్సరాల్లో ఐదు దశల్లో ఈ ప్రాజెక్ట్ పూర్తవుతుంది. దీని ద్వారా 1,250 మందికి ఉపాధి లభిస్తుంది.

కర్నూలు జిల్లా గుట్టపాడు ఇండస్ట్రియల్ పార్కులో అగస్త్య గ్రీన్ ఎనర్జీ లిమిటెడ్ రూ.7,799.96 కోట్లతో సోలార్ ఇన్గార్ట్, సోలార్ వేపర్ తయారీ యూనిట్ ఏర్పాటు చేస్తుంది. ఈ కంపెనీ 156.96 ఎకరాల భూమిని కోరింది. వెయ్యి మందికి ఉద్యోగాలు వస్తాయి.

శ్రీకాకుళం జిల్లా మూలపేటలో కోరమండల్ ఇంటర్నేషనల్ రూ.2,125 కోట్లతో ఫాస్ఫోరిక్ యాసిడ్ ప్లాంట్ నెలకొల్పనుంది. దీనికి 450 ఎకరాలు కేటాయించాలని సంస్థ కోరింది. 400 మందికి ఉద్యోగావకాశాలు లభిస్తాయి.

ఇతర పెద్ద ప్రతిపాదనల్లో తిరుపతిలో రూ.500 కోట్లతో లిథియం అయాన్ సెల్ తయారీ (మునోత్ లిథియం బ్యాటరీ), కడప జిల్లా కొప్పర్తిలో రూ.450 కోట్లతో ఎలక్ట్రానిక్స్ తయారీ (ఏఐఎల్ డిక్సన్), నెల్లూరు జిల్లా దుత్తలూరులో రూ.466 కోట్లతో రక్షణ రంగ ఉత్పత్తుల తయారీ (సన్షైన్ ఎనర్జిటిక్స్), కర్నూలు జిల్లాలో రూ.300 కోట్లతో ఫుడ్ ప్రాసెసింగ్ (జయాదిత్య అగ్రో) వంటివి ఉన్నాయి. తిరుపతిలో సీఆర్ఆర్ హాస్పిటాలిటీ రూ.192 కోట్లతో హోటల్ నిర్మించనుంది.

ఈ ప్రతిపాదనలను రాష్ట్ర పెట్టుబడుల ప్రోత్సాహక కమిటీ (ఎస్ఐపీసీ) సమావేశమై చర్చించింది. ప్రభుత్వ ప్రధాన కార్యదర్శి జి. సాయి ప్రసాద్ అధ్యక్షతన జరిగిన ఈ సమావేశంలో కొన్ని ప్రాజెక్టులకు గడువు పెంపు, ఫీజు మాఫీ ప్రతిపాదనలపై కూడా చర్చ జరిగింది. ఈ ప్రతిపాదనలను తుది ఆమోదం కోసం ముఖ్యమంత్రి చంద్రబాబు నాయుడు నేతృత్వంలోని రాష్ట్ర పారిశ్రామిక ప్రోత్సాహక మండలి (ఎస్ఐపీబీ)కి పంపాలని కమిటీ నిర్ణయించింది.