రవితేజ 'ఇరుముడి'లో పాఠశాల సన్నివేశాలపై ఏపీ టీచర్స్ ఫెడరేషన్ అభ్యంతరం

రవితేజ హీరోగా శివ నిర్వాణ దర్శకత్వంలో వచ్చిన 'ఇరుముడి' సినిమాలో కొన్ని సన్నివేశాలపై ఆంధ్రప్రదేశ్ టీచర్స్ ఫెడరేషన్ అభ్యంతరం వ్యక్తం చేసింది. ఈ చిత్రం గత శుక్రవారం విడుదలైంది.

ప్రభుత్వ పాఠశాలలు, ఉపాధ్యాయుల వ్యవస్థను కించపరిచేలా సన్నివేశాలు ఉన్నాయని ఫెడరేషన్ ఆరోపించింది. టీచర్ పాత్రను ప్రతికూలంగా చూపించారని, ఓ ప్రభుత్వ పాఠశాల స్పష్టంగా కనిపించిందని పేర్కొంది. విద్యార్థులు ప్రస్తుతం ఏపీ ప్రభుత్వ పాఠశాలల్లో అమలులో ఉన్న యూనిఫామ్లలో కనిపించడం కూడా అభ్యంతరమని తెలిపింది.

సమాజంలో ఉపాధ్యాయులకు ఉన్న గౌరవాన్ని దెబ్బతీసే విధంగా సన్నివేశాలు ఉండటం సరికాదని ఫెడరేషన్ నాయకులు అన్నారు. వివాదాస్పద దృశ్యాలను వెంటనే తొలగించాలని డిమాండ్ చేశారు. తొలగించకపోతే ఆందోళన కార్యక్రమాలు చేపడతామని హెచ్చరించారు.

సెన్సార్ బోర్డు, సంబంధిత అధికారులు ఈ విషయంపై చర్యలు తీసుకోవాలని ఫెడరేషన్ కోరింది. చిత్ర యూనిట్ నుంచి అధికారిక స్పందన రావాల్సి ఉంది.