ఆషాఢ మాసం: పెళ్లిళ్లు వద్దు, సాధన చేయండి... దానాలు ఇవ్వండి

ఆషాఢ మాసం చాలా మంది వివాహాలు, గృహ ప్రవేశాలు, ఉపనయనాలు వంటి శుభ కార్యాలను నిలిపివేస్తారు. ఈ సంప్రదాయానికి వ్యవసాయ పరమైన కారణాలు ఉన్నాయి. పూర్వం దేశం వ్యవసాయ ఆధారితంగా ఉండేది. ఆషాఢ మాసంలో పంటలు పండే సమయం. ఈ సమయంలో కుటుంబమంతా పొలాల్లో నిమగ్నమయ్యేవారు. అందుకే ఈ మాసంలో పెండ్లిళ్లు, విందులు పెట్టుకోవడం ఇబ్బందికరంగా ఉండేది. ఈ కారణంగానే ఆషాఢంలో శుభ కార్యాలు చేయకూడదనే నియమం వచ్చింది.

ఆషాఢాన్ని సాధనకు, ఆధ్యాత్మికతకు అనువైన మాసంగా చెబుతారు. ఈ మాసంలో వాతావరణం కూడా సహకరిస్తుంది. జేష్ఠ మాసంలో భరించలేని ఎండలు ఉండగా, ఆషాఢం వచ్చేసరికి ఉష్ణోగ్రతలు తగ్గుతాయి. చిన్న చిన్న జల్లులు పడుతుంటాయి. ఈ సమయంలో మనసు ప్రశాంతంగా ఉండి ధ్యానానికి, భగవదారాధనకు అనుకూలంగా ఉంటుంది. విష్ణువు లేదా లక్ష్మీ నారాయణులకు సంబంధించిన విష్ణు సహస్రనామం, లక్ష్మీ అష్టోత్రం, కనకధార స్తోత్రం వంటివి పారాయణం చేయాలని చెబుతారు. అమ్మవారి ఆరాధన కూడా ఈ మాసంలో మంచిది.

ఆషాఢ మాసంలో దానాల ప్రాధాన్యతను కూడా వివరిస్తారు. వర్షాకాలం మొదలయ్యే సమయం కాబట్టి గొడుగు దానం చేయమంటారు. రోగ నిరోధక శక్తి కోసం బెల్లాన్ని దానం ఇవ్వాలి. ఉప్పు దానం చేస్తే ఆరోగ్య సమస్యలు తగ్గుతాయని నమ్ముతారు. పాదాలను సంరక్షించుకోవడానికి చెప్పులు ఇవ్వాలి. ఇవే కాకుండా బట్టలు, దుప్పట్లు కూడా దానం చేయాలి. ప్రతీ ఒక్కరూ తమ శక్తికి తగ్గట్టు దానాలు చేయాలి. బంగారం ఇవ్వలేని వారు బెల్లం ఇచ్చినా అదే బంగారంతో సమానమే అని చెప్పబడింది.