అస్సాంలో బాల్య వివాహాలపై పోలీసుల పెద్ద ఆపరేషన్: 476 కేసులు, 557 అరెస్టులు

అస్సాంలో బాల్య వివాహాలపై ముఖ్యమంత్రి హిమంత బిస్వా శర్మ ఆదేశాల మేరకు చేపట్టిన ప్రత్యేక డ్రైవ్‌లో ఇప్పటివరకు 476 కేసులు నమోదు కాగా, 557 మందిని అరెస్టు చేశారు. ఇది 2024లో జరిగిన డ్రైవ్‌ను అధిగమించింది. గతసారి 363 కేసులు నమోదు కాగా 432 మంది అరెస్టయ్యారు; ఈసారి 113 కేసులు, 125 అరెస్టులు ఎక్కువగా నమోదయ్యాయి.

ధుబ్రి జిల్లాలో అత్యధికంగా 63 మందిని డిటెన్ చేశారు. తొమ్మిది పోలీస్ స్టేషన్ల పరిధిలో బాల్య వివాహాల్లో నిందితులతో పాటు వారి తల్లిదండ్రులు, సంరక్షకులను కూడా డిటెన్ చేసినట్లు పోలీసులు తెలిపారు. ధుబ్రి సదర్ నుంచి 18, గోలక్‌గంజ్ నుంచి 15, బిలాసిపరా నుంచి 9, గౌరీపూర్ నుంచి 8, చాపర్, ఫకీర్‌గంజ్ నుంచి ఐదేసి, తామర్‌హట్ నుంచి 2, అగోమోని నుంచి ఒకరిని డిటెన్ చేశారు.

శ్రీభూమి జిల్లాలో పోలీసులు 28 కేసులు నమోదు చేసి 32 మందిని అరెస్టు చేశారు. వీరిలో 28 మంది వరులు, నలుగురు సహాయకులు ఉన్నారు. అక్టోబర్ 26 రాత్రి జిల్లాలోని పలు ప్రాంతాల్లో ప్రత్యేక డ్రైవ్ నిర్వహించినట్లు అదనపు SP తెలిపారు. అరెస్టయిన వారిని కోర్టులో హాజరుపరిచారు. కేసుల అవసరాన్ని బట్టి కొన్నింటిలో పోలీసు కస్టడీ మంజూరైందని, మిగిలిన ప్రక్రియ కొనసాగుతుందని పోలీసులు పేర్కొన్నారు.

ఈ డ్రైవ్ సంవత్సరం పొడవునా కొనసాగుతుందని అధికారులు తెలిపారు. బాల్య వివాహాలను నిర్మూలించేందుకు జిల్లా పోలీసులు కట్టుబడి ఉన్నారని వారు చెప్పారు. కొత్త డ్రైవ్‌లో ధుబ్రి జిల్లా మళ్లీ ప్రధాన కేంద్రంగా మారింది.