19వ ఆటా మహాసభలు బాల్టిమోర్లో; 12 వేల మంది హాజరు

అమెరికన్ తెలుగు అసోసియేషన్ (ATA) 19వ మహాసభలు మేరీల్యాండ్ రాష్ట్రంలోని బాల్టిమోర్ నగరంలోని కన్వెన్షన్ సెంటర్లో జరగనున్నాయి. ఈ సభలకు సుమారు 12,000 మంది ప్రతినిధులు హాజరు కాగలరని ATA జాతీయ సమన్వయకర్త శరత్ వేముల తెలిపారు.

ఈ మహాసభలకు తెలంగాణ ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క, ఆంధ్రప్రదేశ్ ముఖ్యమంత్రి చంద్రబాబు నాయుడు, మంత్రి లోకేశ్, వైఎస్ఆర్ కాంగ్రెస్ అధ్యక్షుడు జగన్మోహన్ రెడ్డి, బీజేపీ, జనసేన నాయకులను ఆహ్వానించినట్లు ఆయన చెప్పారు. జగన్మోహన్ రెడ్డి మంచి ఆసక్తి చూపించారని, తమ పార్టీ తరపున ముగ్గురు సభ్యుల ప్రతినిధి బృందాన్ని పంపిస్తామని చెప్పినట్లు శరత్ వేముల వివరించారు. చంద్రబాబు నాయుడు, రేవంత్ రెడ్డిలు కూడా తమ ప్రతినిధులను పంపడానికి అంగీకరించారు.

సినీ ప్రముఖుల్లో నిర్మాత దిల్ రాజు, హీరోయిన్ పూజా హెగ్డే, జానపద కళాకారులు, సంగీత దర్శకులు పాల్గొంటారు. సాంస్కృతిక కార్యక్రమాలు, రాజకీయ చర్చా సదస్సులు, పెట్టుబడుల సమావేశాలు ఏర్పాటు చేస్తున్నట్లు ఆయన తెలిపారు. ఆంధ్రప్రదేశ్, తెలంగాణలోని రియల్ ఎస్టేట్, ఫార్మా, విద్యా సంస్థల ప్రతినిధులు ఇక్కడ స్టాల్స్ ఏర్పాటు చేసి ప్రాజెక్టులు, ఉద్యోగ అవకాశాల గురించి వివరిస్తారు.

ATA తెలుగు వారికి భాష, సంస్కృతి, సంప్రదాయాలను అందుబాటులో ఉంచేందుకు నిరంతరం కృషి చేస్తోందని శరత్ వేముల పేర్కొన్నారు. టాక్స్ ఎగ్జంప్షన్ ద్వారా సభ్యులు తమ స్వంత గ్రామాల్లో మంచినీటి సరఫరా, విద్య, వైద్య శిబిరాలు నిర్వహించేందుకు ATA వెసులుబాటు కల్పిస్తోందన్నారు. విద్యార్థులు, సందర్శకుల సమస్యలకు ప్రత్యేక హెల్ప్ లైన్ ద్వారా ATA తక్షణ స్పందన ఇస్తుందని ఆయన వివరించారు.

ఈ మహాసభలకు అమెరికాతో పాటు సింగపూర్, మలేషియా, మిడిల్ ఈస్ట్ దేశాల నుంచి కూడా తెలుగు వారు హాజరవుతున్నారు. 500కి పైగా కుటుంబాలు దాతలుగా నమోదు చేసుకున్నట్లు శరత్ వేముల తెలిపారు. మూడు రోజుల పాటు జరిగే ఈ సదస్సు తెలుగు సమాజ ఐక్యతకు, అభివృద్ధికి ఒక వేదికగా నిలుస్తుందని ఆయన ఆశాభావం వ్యక్తం చేశారు.