గచ్చిబౌలి అంజయ నగర్లో ప్రమాదకర భవనాన్ని కూల్చివేసిన అధికారులు

హైదరాబాద్ గచ్చిబౌలి అంజయ నగర్లో ప్రమాదకరంగా ఉన్న ఏడంతస్తుల భవనాన్ని అధికారులు కూల్చివేశారు. సైబ్రాబాద్ మున్సిపల్ కార్పొరేషన్, HYDRAA బృందాలు సంయుక్తంగా ఈ చర్య చేపట్టాయి.

సాజిదా అనే వ్యక్తికి చెందిన ఏడంతస్తుల భవనం ఇంతకుముందు కూలిపోయింది. ఆ శిథిలాలు పక్కనే ఉన్న మరో ఏడంతస్తుల భవనంపై పడ్డాయి. దీంతో ఆ భవనం తీవ్రంగా దెబ్బతిని ఏ క్షణమైనా కూలిపోయే స్థితికి చేరుకుంది.

చుట్టుపక్కల భవనాలకు, ప్రజలకు ప్రమాదం ఉందని మున్సిపల్ అధికారులు నిర్ధారించారు. వారి అభ్యర్థన మేరకు HYDRAA బృందాలు కూల్చివేత ప్రారంభించాయి. ముందు జాగ్రత్తగా సమీపంలోని స్టెర్లింగ్ వైట్ ఫీల్డ్ అపార్ట్‌మెంట్ నివాసితులను ఖాళీ చేయించారు. పోలీసులు ఆ ప్రాంతంలో పటిష్ట బందోబస్తు నిర్వహించారు.

అంజయ నగర్లో ఎలాంటి అనుమతులు లేకుండా కేవలం 50 గజాల స్థలంలోనే ఏడు అంతస్తుల వరకు పేకమేడల్లాంటి భవనాలు నిర్మించినట్లు అధికారులు తెలిపారు. ఈ అక్రమ నిర్మాణాలు ప్రజల ప్రాణాలకు ముప్పుగా మారడంతో కఠిన చర్యలు తీసుకుంటున్నట్లు చెప్పారు.