డాక్టర్ AV గురువా రెడ్డి, కే సుధీర్ రెడ్డిపై ఎస్సీ/ఎస్టీ అట్రాసిటీ కేసు నమోదు

హైదరాబాద్, జూబ్లీహిల్స్: ప్రముఖ ఆర్థోపెడిక్ సర్జన్ డాక్టర్ ఏవి గురువా రెడ్డితో పాటు మరో వైద్యుడు డాక్టర్ కే సుధీర్ రెడ్డిపై జూబ్లీహిల్స్ పోలీస్ స్టేషన్లో కేసు నమోదైంది. జూబ్లీహిల్స్ రోడ్ నంబర్ 36లో అపియాన్ పెయిన్ మేనేజ్మెంట్ సెంటర్ నడిపే డాక్టర్ సుధీర్ ధారా ఇచ్చిన ఫిర్యాదు మేరకు ఎఫ్ఐఆర్ నెంబర్ 406/2026 కింద ఈ కేసు నమోదు చేశారు.

డాక్టర్ సుధీర్ ధారా తన ఫిర్యాదులో, డాక్టర్ గురువా రెడ్డి, డాక్టర్ సుధీర్ రెడ్డి సోషల్ మీడియాలో తనపై తప్పుడు ప్రచారం చేస్తూ, ‘మోసగాడు’, ‘ఫ్రాడ్’ అంటూ పోస్టులు పెడుతున్నారని ఆరోపించారు. ఈ ప్రచారం వల్ల తన పరువుకు నష్టం వాటిల్లిందని, రోగులు తనపై వ్యతిరేకంగా మారే ప్రమాదం ఉందని ఆయన పేర్కొన్నారు. తన కులాన్ని లక్ష్యంగా చేసుకుని వేధింపులకు గురిచేస్తున్నారని, క్లినిక్ వద్దకు కొంతమంది వచ్చి దాడికి ప్రయత్నించారని కూడా ఫిర్యాదులో తెలిపారు.

ఈ ఫిర్యాదును స్వీకరించిన పోలీసులు ఎస్సీ/ఎస్టీ (అట్రాసిటీ నిరోధక) చట్టం 1989లోని సెక్షన్లతో పాటు భారతీయ న్యాయ సంహిత (BNS) 2023 లోని 351(2) (క్రిమినల్ బెదిరింపు), 352 (శాంతి భద్రతలకు భంగం కలిగించేలా అవమానించడం) మరియు ఉమ్మడి ఉద్దేశ్యంతో నేరానికి పాల్పడినప్పుడు వర్తించే సెక్షన్ 35 కింద కేసు నమోదు చేశారు. ఎస్సీ/ఎస్టీ చట్టంలో షెడ్యూల్ కులాల వ్యక్తిని బహిరంగంగా అవమానించడం, కులం పేరుతో దూషించడం, సమాజంలో ద్వేషం రెచ్చగొట్టడం వంటి సెక్షన్లను కూడా ఎఫ్ఐఆర్లో చేర్చినట్లు పోలీసులు తెలిపారు.

ప్రస్తుతం పోలీసులు సోషల్ మీడియా పోస్ట్లు, క్లినిక్ వద్ద జరిగిన సంఘటనలపై ఆధారాలు సేకరిస్తున్నారు. ఈ వివాదంపై నిందితులు డాక్టర్ గురువా రెడ్డి లేదా డాక్టర్ కే సుధీర్ రెడ్డి నుంచి ఎలాంటి స్పందన రాలేదు.