అయోధ్య రామమందిరం విరాళాల కేసు: SIT కీలక నిర్ణయం, ఐదేళ్ల ఖాతాల రీ-ఆడిట్

అయోధ్య రామ మందిరం విరాళాల కేసులో విచారణ చేపట్టిన SIT (ప్రత్యేక దర్యాప్తు బృందం) కీలక నిర్ణయం తీసుకుంది. గత ఐదేళ్ల అయోధ్య ట్రస్ట్ ఖాతాలను రీ-ఆడిట్ చేయనుంది.

ఈ దర్యాప్తులో నిర్మాణ వ్యయాలు, విరాళాలుగా వచ్చిన బంగారం, వెండి వస్తువులతో పాటు భారీ అవకతవకలు జరిగినట్లు SIT గుర్తించింది.

ప్రధాన నిందితుడు అవినాష్ శుక్లాను పోలీసులు అరెస్ట్ చేసి, కోర్టు అనుమతితో 24 గంటల కస్టడీలో విచారించారు. అతని నుంచి రూ.20.39 లక్షల నగదు స్వాధీనం చేసుకున్నారు.

అలాగే కరుణేష్ పాండే (రూ.18.07 లక్షలు), అనుకురూప్ మిశ్రా (రూ.16.82 లక్షలు), లవకృష్ మిశ్ర (రూ.14.25 లక్షలు) తదితరుల నుంచి నగదును స్వాధీనం చేసుకున్నారు. మొత్తంగా ఏడుమంది నిందితుల నుంచి సుమారు రూ.77.85 లక్షల నగదు, 11 గ్రాముల బంగారం, 375 గ్రాముల వెండిని SIT సీజ్ చేసింది.

ఈ కేసు నేపథ్యంలో ట్రస్ట్ ప్రధాన కార్యదర్శి చంపత్రాయ్, ట్రస్టీ అనిల్ మిశ్ర తమ పదవులకు రాజీనామాలు సమర్పించారు. ఈ నెల 6న జరిగే ట్రస్ట్ సమావేశంలో వారి రాజీనామాలపై తుది నిర్ణయం తీసుకుంటారని సమాచారం.

ఇదే విషయంలో ఆర్ఎస్ఎస్ స్పందించింది. సర్కార్యవాహ దత్తాత్రేయ హోసబలే మాట్లాడుతూ, విరాళాల చోరీ భక్తుల మనోభావాలను దెబ్బతీసిందని, దోషులను కఠినంగా శిక్షించాలని, వ్యవస్థాగత లోపాలను వెంటనే సరిదిద్దాలని డిమాండ్ చేశారు.