అయోధ్య రామమందిర నిధుల అవకతవకలపై హైదరాబాద్‌లో రౌండ్‌ టేబుల్ సమావేశం

అయోధ్య రామమందిర నిధుల్లో అవకతవకలు ఆరోపిస్తూ హైదరాబాద్‌లో రౌండ్‌ టేబుల్ సమావేశం జరిగింది. సమాజ్‌వాదీ పార్టీ, తెలంగాణ సమాజ్‌వాదీ పార్టీ సంయుక్తంగా ఈ సమావేశాన్ని బాగ్‌లింగంపల్లిలోని సుందరయ్య విజ్ఞాన కేంద్రంలో నిర్వహించాయి.

ఎమ్మెల్సీ అద్దంకి దయాకర్ మాట్లాడుతూ, రామమందిర నిధుల కుంభకోణంపై ప్రధాని నరేంద్ర మోదీ ఇప్పటికీ స్పందించలేదని విమర్శించారు. బ్రిటిష్ వారిని తరిమికొట్టిన వారికి బీజేపీని తరిమికొట్టడం పెద్ద విషయం కాదని ఆయన అన్నారు. రాహుల్ గాంధీ ప్రస్తుతం దేశంలో అత్యంత నిజాయితీ గల నాయకుడని ఆయన అభిప్రాయపడ్డారు.

ప్రొఫెసర్ కంచ ఐలయ్య మాట్లాడుతూ, రామమందిరంలో విరాళాల నిర్వహణలో తీవ్రమైన అవినీతి జరిగిందని ఆరోపించారు. ఈ ఆలయ నిధులకు ఎలాంటి ఆడిట్, పారదర్శకత లేదని, ఖాతాల నిర్వహణపై ఎటువంటి లెక్కాచారం లేదని ఆయన అన్నారు. ఇది క్రిమినల్ కేసు కాబట్టి, సుప్రీంకోర్టు పర్యవేక్షణలో సిట్ విచారణ జరపాలని ఆయన డిమాండ్ చేశారు. సీబీఐ ప్రస్తుతం బీజేపీ ప్రభుత్వం నియంత్రణలో ఉండి, ప్రతిపక్షాలపై అక్రమ కేసులు నమోదు చేయడానికి ఉపయోగపడుతోందని ఆయన విమర్శించారు.

ఈ సమావేశంలో సీపీఐ రాష్ట్ర కార్యదర్శి జాన్ వెస్లీ, తెలంగాణ జనసమితి ఉపాధ్యక్షులు విశ్వేశ్వరరావు, ఎంపీ చామల కిరణ్ కుమార్ తదితరులు పాల్గొన్నారు. బీజేపీ, ఆర్ఎస్ఎస్‌లు రామమందిర ఉద్యమాన్ని అధికారం కోసం ఉపయోగించుకున్నాయని, ఆ నిధుల్లోనే అవినీతి జరిగిందని నేతలు ఆరోపించారు.

హుండీ ద్వారా వచ్చే నగదు, ఇతర విరాళాలకు సంబంధించి ఎలాంటి రిజిస్టర్ నిర్వహించడం లేదని ఆరోపించారు. ఇది మెజారిటీ ప్రజల విశ్వాసానికి సంబంధించిన అంశం అని, ప్రభుత్వం తగిన చర్యలు తీసుకోవాలని నేతలు డిమాండ్ చేశారు.