బద్రీనాథ్ ఆలయంలో కానుకల చోరీ ఆరోపణలపై విచారణకు ఆదేశం

బద్రీనాథ్ ఆలయంలో కానుకల చోరీ జరిగిందని సోషల్ మీడియాలో ప్రచారం జరుగుతోంది. ఈ నేపథ్యంలో బద్రీనాథ్-కేదార్నాథ్ ఆలయ కమిటీ (బీకేటీసీ) స్పందించింది. ఆరోపణలకు తగిన ఆధారాలు లేకపోయినా విచారణ చేపట్టాలని నిర్ణయించింది.

విచారణ కమిటీ ఏర్పాటు చేసి ఆరోపణల నిజానిజాలు తేల్చాలని ఆదేశించారు. బీకేటీసీ చీఫ్ ఎగ్జిక్యూటివ్ ఆఫీసర్ సోహన్ సింగ్ రంగర్ తమ పరిధిలోని అన్ని ఆలయాల్లో చందాలు, కానుకల నిర్వహణపై కఠినమైన మార్గదర్శకాలు జారీ చేశారు. నగదు నిర్వహణలో ఎలాంటి నిర్లక్ష్యం లేదా అవకతవకలు జరిగితే కఠిన చర్యలు తీసుకుంటామని హెచ్చరించారు.

అన్ని లెక్కింపు కేంద్రాలు, ట్రెజరీ సిబ్బంది అప్రమత్తంగా వ్యవహరించాలని, ప్రతి కానుకకు ఖచ్చితమైన రికార్డులు నిర్వహించాలని సూచించారు. ఈ ఉత్తర్వులను ఆలయ కమిటీ చైర్మన్లు, ఇంచార్జీలు, అకౌంటెంట్లకు పంపించారు.

ఇటీవల అయోధ్య రామ మందిరంలో విరాళాల చోరీ కేసు దేశవ్యాప్తంగా చర్చనీయాంశంగా మారింది. ఈ తరుణంలో బద్రీనాథ్ ఆలయంలో కానుకల చోరీపై సోషల్ మీడియాలో ప్రచారం ప్రాముఖ్యతను సంతరించుకుంది.