సదర్ పండుగకు 2 టన్నుల బాహుబలి దున్నపోతు హైదరాబాద్‌కు

హైదరాబాద్‌లో సదర్ పండుగ కోసం బాహుబలి అనే దున్నపోతును తీసుకొచ్చారు. ఈ దున్నపోతు బరువు రెండు టన్నులకు (2000 కిలోలు) పైగా ఉంది.

బాహుబలిని కేరళలోని త్రిశూర్ నుంచి తీసుకొచ్చారు. దీన్ని కేరళకు చెందిన షానవాస్ కొనుగోలు చేశారు. ఇంతకుముందు ఈ దున్నపోతు హర్యానాలో ఉండేది.

దీని ఎత్తు 8 అడుగులకు పైగా, పొడవు 14 అడుగులు ఉంటుందని యజమానులు చెప్తున్నారు. ప్రపంచంలోనే అత్యంత పెద్ద దున్నపోతు ఇదేనని వారు పేర్కొంటున్నారు.

చప్పల్ బజార్‌లోని నందకిశోర్ యాదవ్ ఇంటి వద్ద ఈ దున్నపోతును ఉంచారు. నాలుగేళ్ల నుంచి వారి కుటుంబం బాహుబలిని సదర్ పండుగకు తీసుకొస్తోంది. వారి వద్ద బాబు అనే మరో దున్నపోతు కూడా ఉంది. దాని బరువు 1800 కిలోలు.

కేరళ నుంచి హైదరాబాద్ వరకు తీసుకొచ్చేందుకు సుమారు ₹50,000 నుంచి ₹60,000 వరకు రవాణా ఖర్చు అయిందని యజమానులు తెలిపారు.

సదర్ అనేది యాదవ సమాజం జరుపుకునే పండుగ. దీపావళి సమయంలో ఈ పండుగ వస్తుంది. యాదవుల ఐక్యతను చాటడం, పెద్దలను గౌరవించడం ఈ పండుగ ప్రత్యేకత.

సదర్ రోజున దున్నపోతులను పూల దండలు, గజ్జలు, గంటలతో అలంకరిస్తారు. నారాయణగూడలో జరిగే సదర్ కార్యక్రమంలో ఈ దున్నపోతులు కనిపిస్తాయి.