2026 బాలాపూర్ గణేష్ కోసం ధూల్‌పేట్ కళాకారుని ప్రత్యేక విగ్రహాలు

హైదరాబాద్‌లోని ధూల్‌పేట్ ప్రాంతానికి చెందిన కళాకారుడు లక్ష్మీ నారాయణ మూర్తి 2026 బాలాపూర్ గణేష్ ఉత్సవాల కోసం విగ్రహాల తయారీలో నిమగ్నమయ్యారు. ఈ కళ ఆయన కుటుంబంలో తరతరాలుగా సాగుతోంది. ప్రస్తుతం విగ్రహాల కాస్టింగ్ పనులు శరవేగంగా జరుగుతున్నాయి.

ఈ సంవత్సరం ప్రత్యేకంగా గణేష్ విగ్రహం తలపై శివపార్వతుల రూపాన్ని, పగడీని చేర్చారు. గత సంవత్సరం ఉజ్జయిని మహాకాల్ డిజైన్ తయారు చేసినట్లు చెప్పారు. ఈ విగ్రహాలు POP, ఫైబర్, సిమెంట్ తదితర మెటీరియల్స్ తో తయారవుతాయి.

బాలాపూర్ ప్రాంతంలో 40 గణేష్ మండపాలు ఉండగా, వాటికి అవసరమయ్యే 15 అడుగుల ఎత్తైన విగ్రహాలను తయారు చేస్తున్నామని మూర్తి తెలిపారు. వీటికి అదనంగా ఫైబర్ కిరీటం వేస్తే 20 అడుగుల వరకు ఎత్తు ఉంటుంది. చిన్న సైజుల విగ్రహాలు కూడా చేస్తామన్నారు.

దీపావళి తరువాత నుంచే విగ్రహాల తయారీ మొదలుపెడతామని, కాస్టింగ్ పూర్తి చేయడానికి రెండు రోజులు పడుతుందని మూర్తి వివరించారు. తమ కుటుంబంలోని 15 మంది సభ్యులు ఈ పనిలో సహకరిస్తున్నారు.

ధూల్‌పేట్ కళాకారుల నైపుణ్యం దక్షిణ భారతదేశం మొత్తం ప్రసిద్ధి చెందిందని, ఇక్కడ అందరికీ స్వాగతం పలుకుతామని మూర్తి అన్నారు.