నంద్యాల జిల్లా: బనగానపల్లె ప్రభుత్వ ఆసుపత్రిలో కవల ప్రసవం, అడ్డంగా తిరిగిన బిడ్డకు శస్త్రచికిత్స విజయవంతం

నంద్యాల జిల్లాలోని బనగానపల్లె ప్రభుత్వ ఏరియా ఆసుపత్రిలో వైద్యులు రెండు క్లిష్టమైన ప్రసవాలను విజయవంతంగా నిర్వహించారు.

పాణ్యం మండలం కొనిదేడు గ్రామానికి చెందిన ఒక గర్భిణి తొలి కానుపులో బిడ్డ అడ్డంగా తిరిగింది. వైద్యులు ఎలాంటి ప్రమాదం లేకుండా సర్జరీ చేసి 3 కేజీల బరువున్న ఆడశిశువును క్షేమంగా బయటకు తీశారు. అదే ఆసుపత్రిలో మరో మహిళకు సాధారణ ప్రసవం ద్వారా కవల పిల్లలు జన్మించారు. తల్లి, ఇద్దరు పిల్లలు సురక్షితంగా ఉన్నారు.

ఆసుపత్రి సూపరింటెండెంట్ ఉమాదేవి మాట్లాడుతూ, ప్రతి నెల సుమారు 25 నుంచి 30 మంది గర్భిణీలకు సర్జరీలు చేస్తున్నామని, గత నెల మొత్తం 70 ప్రసవాలు జరిగాయని తెలిపారు. గర్భిణులు ప్రతి నెలా పరీక్షలు చేయించుకోవాలని, ఆసుపత్రిలో జనరల్ మెడిసిన్, బీపీ, షుగర్, పంటి, మోకాళ్ల నొప్పులు, ఈఎన్టీ వంటి అన్ని సేవలు అందుబాటులో ఉన్నాయని సూచించారు.