బాసర జ్ఞాన సరస్వతి ఆలయంలో గర్భగుడి దర్శనాలు నిలిపివేత

బాసర లోని జ్ఞాన సరస్వతి అమ్మవారి ఆలయంలో ప్రధాన గర్భగుడి దర్శనాలను నేటి మధ్యాహ్నం నుంచి నిలిపివేస్తున్నారు. ఆలయ పునర్నిర్మాణ పనుల కారణంగా ఈ నిర్ణయం తీసుకున్నట్లు ఆలయ అధికారులు తెలిపారు.

ఇకపై గర్భగుడిలోకి భక్తులను అనుమతించరు. అర్చకులు మాత్రమే నిత్యపూజలు నిర్వహిస్తారు. భక్తుల కోసం ప్రత్యేకంగా బాలాలయాన్ని ఏర్పాటు చేశారు. అక్షరాభ్యాసం, కుంకుమార్చన, ఇతర సేవలు ఈ బాలాలయంలోనే జరుగుతాయి. గతంలో ₹150 టికెట్ హాలుగా ఉన్న స్థలంలో బాలాలయాన్ని ఏర్పాటు చేసి, అమ్మవారి విగ్రహాన్ని ప్రతిష్ఠించారు.

గర్భగుడి, అనివేలి మండపం పునర్నిర్మాణానికి ఒక దాత ₹31 కోట్లతో ముందుకు వచ్చారు. వీటిని కృష్ణ శిలతో నిర్మించనున్నారు. అదనంగా, రాష్ట్ర ప్రభుత్వం ఆలయ సమగ్రాభివృద్ధికి ₹300 కోట్లు కేటాయించింది. నాలుగు గోపురాలు, అక్షర మండపం, ప్రసాదాల ప్రాంగణం వంటి పనులు ప్రభుత్వం చేపడుతోంది.

రాబోయే జూన్-జులైలో గోదావరి పుష్కరాలు జరగనున్న నేపథ్యంలో, గర్భగుడి పునర్నిర్మాణం ఒక ఏడాదిలోపు పూర్తి చేయాలన్న లక్ష్యంగా అధికారులు పనిచేస్తున్నారు. ఈరోజు చివరి సారిగా గర్భగుడి దర్శనం లభించడంతో భక్తులు పెద్ద సంఖ్యలో వచ్చారు. భక్తులు సహకరించాలని అధికారులు విజ్ఞప్తి చేశారు.