తెలంగాణలో బతుకమ్మ సంబరాలు ప్రారంభం; 18న సద్దుల బతుకమ్మ వేడుకలు

తెలంగాణలో బతుకమ్మ వేడుకలు నేటి నుంచి ప్రారంభమయ్యాయి. తొమ్మిది రోజుల పాటు ఈ పూల పండుగ జరుగుతుంది. ఆడపడుచులు తంగేడు, గునుగు, చామంతి, బంతి వంటి పూలతో బతుకమ్మలను పేరుస్తారు.

రాష్ట్ర ప్రభుత్వం అన్ని జిల్లాల్లోనూ ఏర్పాట్లు పూర్తి చేసింది. గ్రామాలు, పట్టణాల్లో పండుగ వాతావరణం కనిపిస్తోంది. పండుగ చివరి రోజైన ఈ నెల 18న సద్దుల బతుకమ్మ జరుగుతుంది.

హైదరాబాద్ ట్యాంక్ బండ్ వద్ద ప్రభుత్వం సద్దుల బతుకమ్మ వేడుకలను నిర్వహిస్తుంది. తెలంగాణ అమరవీరుల స్మారక స్తూపం నుంచి ట్యాంక్ బండ్ వరకు మహిళలతో భారీ బతుకమ్మ ర్యాలీ ఉంటుందని అధికారులు తెలిపారు. సాంస్కృతిక ప్రదర్శనలు, విద్యుత్ అలంకరణలు, బాణాసంచా కాల్పులు ఉంటాయి.

ట్యాంక్ బండ్, నెక్లెస్ రోడ్ పరిసరాల్లో ట్రాఫిక్ మళ్లింపు చర్యలు చేపట్టారు. మహిళలు, సందర్శకుల కోసం ప్రత్యేక రవాణా సౌకర్యాలు కల్పించారు. రవీంద్రభారతితో పాటు ప్రధాన పర్యాటక ప్రాంతాల్లో పది రోజుల పాటు సాంస్కృతిక కార్యక్రమాలు జరుగుతాయి.

చెరువులు, కుంటల వద్ద పారిశుద్ధ్యం, లైట్లు, బారికేడ్లు, గజ ఈతగాళ్లను ఏర్పాటు చేశారు. మహిళల రక్షణ కోసం She Teams, CCTV నిఘా ఉంటుంది.