బంగాళాఖాతంలో అల్పపీడనం: 16 నాటికి తుఫానుగా మారి ఆక్వాన్ అయ్యే అవకాశం

ఆంధ్రప్రదేశ్ తీరానికి మరో తుఫాను ముప్పు కనిపిస్తోంది. బంగాళాఖాతంలో ఏర్పడిన అల్పపీడనం క్రమంగా బలపడుతోంది. ఈ నెల 15న ఇది వాయుగుండంగా మారుతుందని వాతావరణ శాఖ అంచనా వేస్తోంది.

16 సాయంత్రానికి ఇది తుఫానుగా బలపడే అవకాశం ఉంది. తుఫానుగా మారితే దీనికి ఆక్వాన్ అని పేరు పెడతారు. ఈ నెల 15 నుంచి సముద్రంలో ఈదురుగాలుల తీవ్రత పెరుగుతుంది.

తుఫాను ఉత్తర కోస్తా ఆంధ్రప్రదేశ్, దక్షిణ ఒడిశా వైపు పయనించే అవకాశం ఉందని ప్రాథమిక అంచనాలు చెప్తున్నాయి. తీరం దాటే ప్రాంతం, గమనం, తీవ్రతపై ఇంకా స్పష్టత రాలేదు. గోపాల్‌పూర్, కళింగపట్నం మధ్య తీరం దాటే అవకాశం ఉన్నట్టు అంచనాలు ఉన్నాయి. తాజా అంచనాల ప్రకారం ఈ నెల 19 నాటికి తీర ప్రాంతాలపై ప్రభావం ఉండవచ్చు. గతంలో గోపాల్‌పూర్, శ్రీకాకుళం ప్రాంతాలు ఎలా ప్రభావితమయ్యాయో, ఈసారి కూడా అలాంటి ప్రభావం ఉండవచ్చని అంచనా వేస్తున్నారు.

ఏపీ ప్రభుత్వం అధికారులను అప్రమత్తం చేసింది. విశాఖపట్నంలో CII సదస్సులో ఉన్న ముఖ్యమంత్రి చంద్రబాబు నాయుడు, సదస్సు ముగిసిన తర్వాత తుఫానుపై టెలికాన్ఫరెన్స్ నిర్వహించాలని ఆదేశించారు. హోమ్ మినిస్టర్ అనిత రక్షణ చర్యలపై సమీక్ష చేస్తున్నారు.

తుఫాను ఎప్పుడు, ఎక్కడ తీరం దాటుతుందనే దానిపై ఇంకా స్పష్టత లేదు. తాజా అంచనాలు ఈరోజు సాయంత్రం వరకు తెలిసే అవకాశం ఉంది.