బెంగళూరులో బైకర్లు అంబులెన్స్‌ను అడ్డుకుంటూ ప్రమాదకర విన్యాసాలు; పోలీసుల దర్యాప్తు

బెంగళూరులోని గోరగుంటెపాళ్యం నుంచి యశ్వంతపుర వైపు వెళ్లే ప్రధాన రహదారిపై కొందరు యువకులు బైకులపై ప్రమాదకర విన్యాసాలు చేశారు. ఈ సందర్భంగా అత్యవసర పరిస్థితిలో ఉన్న రోగిని తీసుకెళ్తున్న ఓ అంబులెన్స్‌కు దారివ్వకుండా ఆ బైకర్లు దాని ముందు వెళ్తూ వేగాన్ని అడ్డుకున్నారు.

అంబులెన్స్ డ్రైవర్ నిరంతరం హారన్ మోగించి దారి ఇవ్వాల్సిందిగా కోరినా, బైకర్లు పట్టించుకోలేదు. వారు రోడ్ మొత్తాన్ని ఆక్రమించి, స్టంట్లు చేస్తూ ముందుకు సాగారు. దీంతో రోగికి సకాలంలో చికిత్స అందించడంలో ఆటంకం కలిగింది.

ఈ దృశ్యాలతో కూడిన వీడియో సామాజిక మాధ్యమాల్లో వైరల్ అయింది. నెటిజన్లు ఆగ్రహం వ్యక్తం చేస్తూ, బైకర్లపై కఠిన చర్యలు తీసుకోవాలని డిమాండ్ చేశారు.

ఘటన ఆధారంగా బెంగళూరు ట్రాఫిక్ పోలీసులు దర్యాప్తు ప్రారంభించారు. వైరల్ వీడియోలో కనిపించిన బైక్ల నంబర్ల ఆధారంగా నిందితులను గుర్తించే పని కొనసాగుతోంది. త్వరలో వారిని పట్టుకుంటామని పోలీసు వర్గాలు తెలిపాయి.