భాద్రపద మాస శివరాత్రి విశిష్టత: శివ పూజా విధానాలు, మంత్రాలు

భాద్రపద మాసంలో వచ్చే మాస శివరాత్రి ఈసారి గురువారం నాడు వస్తోంది. ఈ రోజున ప్రత్యేక పూజలు చేస్తే శివానుగ్రహం లభిస్తుందని భక్తుల విశ్వాసం.

భక్తులు పగలు ఉపవాసం ఉండి, సాయంత్రం నక్షత్ర దర్శనం తర్వాత ఆహారం తీసుకుంటారు. ప్రదోష కాలంలో శివాలయ దర్శనం, హారతి, ఆలయ ప్రాంగణంలో దీపం వెలిగించడం వంటి విధానాలు పాటిస్తారు. వీలైతే శివాలయంలో చండీ ప్రదక్షిణ చేయడం కూడా ఆనవాయితీ.

ఆలయానికి వెళ్లలేని వారు ఇంట్లో రుద్రాభిషేకం చేయవచ్చు. దర్భజలాలతో శివుడికి అభిషేకం చేయడాన్ని కుశోదకం అంటారు. ఇలా చేస్తే శివానుగ్రహం త్వరగా కలుగుతుందని నమ్ముతారు.

ఈ సందర్భంగా రెండు మంత్రాలను జపించడం ఆనవాయితీ. మొదటిది 'ఓం హ్రీం నమఃశివాయ'. ఇది ఆత్మవిశ్వాసాన్ని పెంచుతుందని భక్తుల నమ్మకం. రెండోది 'ఓం తత్పురుషాయ నమః'. ఇది చేస్తున్న పనిలో ఏకాగ్రతను పెంచుతుందని చెబుతారు. గురువారం, మాస శివరాత్రి కలిసి రావడాన్ని భక్తులు విశేషంగా భావిస్తారు.