తెలంగాణ ప్రభుత్వ ఉద్యోగులకు కొత్త హెల్త్ స్కీమ్: హెల్త్ కార్డులు పంపిణీ ప్రారంభం

డిప్యూటీ సీఎం భట్టి విక్రమార్క, ఆరోగ్య శాఖ మంత్రి దామోదర రాజనరసింహతో కలిసి రాష్ట్ర ప్రభుత్వ ఉద్యోగులకు హెల్త్ కార్డులు పంపిణీ కార్యక్రమంలో పాల్గొన్నారు. ఈ సందర్భంగా కొత్త ఎంప్లాయీస్ హెల్త్ స్కీమ్ ప్రారంభించినట్లు ప్రకటించారు.

కంట్రిబ్యూటరీ విధానంలో ఒక ట్రస్ట్ ఏర్పాటు చేశామని భట్టి వెల్లడించారు. ట్రస్ట్‌లో చీఫ్ సెక్రటరీ, సంబంధిత అధికారులు, ఉద్యోగ సంఘాల ప్రతినిధులు సభ్యులుగా ఉంటారు. ఈ పథకం ద్వారా రాష్ట్రంలోని 8 లక్షల మంది ఉద్యోగులతో పాటు, పెన్షనర్లు మరియు వారి కుటుంబ సభ్యులకు వైద్య ఖర్చులు ప్రభుత్వం భరిస్తుంది.

ఈ పథకం వల్ల ఉద్యోగులు అనారోగ్య సమయంలో ఆర్థిక ఆందోళన లేకుండా పనిచేయగలరని, వారి నిబద్ధత పెరుగుతుందని డిప్యూటీ సీఎం అన్నారు. రాష్ట్రవ్యాప్తంగా ఈరోజు హెల్త్ కార్డుల పంపిణీ ప్రారంభమైంది.

‘ప్రభుత్వం ఉద్యోగుల సమస్యలన్నింటినీ పరిష్కరిస్తుంది’ అని భట్టి హామీ ఇచ్చారు. ఆయనతో పాటు మంత్రులు దుద్దిల్ల శ్రీధర్ బాబు, పొన్నం ప్రభాకర్, కేశవరావు ఈ కార్యక్రమంలో పాల్గొన్నారు.