భువనగిరి మాజీ ఎమ్మెల్యే కొమ్మిడి నరసింహారెడ్డి కన్నుమూత

భువనగిరి మాజీ ఎమ్మెల్యే కొమ్మిడి నరసింహారెడ్డి (83) కన్నుమూశారు. అనారోగ్యంతో హైదరాబాద్‌లోని కుమార్తె ఇంటిలో ఆయన తుది శ్వాస విడిచారు.

యాదాద్రి జిల్లా బ్రాహ్మణపల్లిలో జన్మించిన నరసింహారెడ్డి సంపన్న వ్యవసాయ కుటుంబం నుంచి వచ్చారు. స్వంతంగా వందల ఎకరాల భూమి, పశుసంపద ఉన్న ఆయన, 300 ఎకరాల భూమిని పేదలకు, దళితులకు దానంగా ఇచ్చారు. దీంతో ఆయనకు 'భూదాన్ రెడ్డి' అని పేరు వచ్చింది.

ఎనిమిదేళ్లు సర్పంచ్‌గా సేవలందించారు. తెలంగాణ పోరాట సమితిలో చేరి భువనగిరి తాలూకా కార్యదర్శిగా పనిచేశారు. కాంగ్రెస్ పార్టీ తరఫున ఎమ్మెల్యేగా గెలిచిన ఆయన, 1983లో రెండోసారి ఎమ్మెల్యేగా ఎన్నికయ్యారు. భువనగిరి, ఆలేరు ప్రాంతాలకు నీటి సౌకర్యం, బీబీనగర్‌లో ఎయిమ్స్ ఏర్పాటు కోసం పోరాటం చేశారు.

సంపన్న నేపథ్యం నుంచి వచ్చినా, అత్యంత సాధారణ జీవితం గడిపారు. స్కూటర్‌పై తిరుగుతూ, ఇల్లు కూడా లేకుండా ఆయన జీవించారు. ఆయన భార్య రెండేళ్ల క్రితం మృతి చెందగా, ఇద్దరు కొడుకులు, ఇద్దరు కూతుళ్లు ఉన్నారు.

మరణానంతరం ఆయన అవయవాలు దానం చేయడం జరిగింది. రేపు సొంతూరు బ్రాహ్మణపల్లిలో అంత్యక్రియలు జరుగుతాయని కుటుంబ సభ్యులు తెలిపారు.