76 ఏళ్లకు 50 కిలోల గదతో వ్యాయామం... బీహార్ మల్లయోధుడి ఫిట్‌నెస్ యువకులకు సవాల్

బీహార్‌లోని గయాకు చెందిన 76 ఏళ్ల మల్లయోధుడు పండిత్ హీరానాథ్ మెహెర్వార్ వయసును లెక్కచేయకుండా నిత్యం కఠిన వ్యాయామంతో యువకులకు సవాల్ విసురుతున్నారు. ప్రతిరోజు 40 నిమిషాలకు పైగా వ్యాయామం చేస్తూ, 50 కిలోల బరువైన గదను ఒంటి చేత్తో సునాయాసంగా తిప్పుతారు. అంతేకాకుండా, 100కు పైగా push-ups చేయడం ఆయనకు అలవాటు.

గయాలోని విష్ణుపద దేవ్ ఘాట్ సమీపంలో ఉన్న సంగత్ ఘాట్ అఖాడాకు హీరానాథ్ గురువుగా వ్యవహరిస్తున్నారు. దాదాపు 150 ఏళ్ల చరిత్ర ఉన్న ఈ అఖాడాలో 69 ఏళ్ల నుంచి ఆయన మల్లయుద్ధ సంప్రదాయాన్ని కొనసాగిస్తున్నారు. స్వయంగా రెజ్లర్‌గా రాణించడంతో పాటు వందలాది మందికి శిక్షణ ఇచ్చారు. అంతర్జాతీయ రెజ్లర్ సందీప్ కుమార్ పాఠక్, జాతీయ స్థాయి రెజ్లర్ రితీక్ సింగ్ వంటి ప్రతిభావంతులు హీరానాథ్ దగ్గరే మెళకువలు నేర్చుకున్నారు.

ఇంత భారీ వ్యాయామాలు వద్దని వైద్యులు సూచించినా, హీరానాథ్ మాత్రం తన వ్యాయామమే ఆరోగ్య రహస్యంగా చెబుతున్నారు. మల్లయుద్ధం తనకు కేవలం క్రీడ మాత్రమే కాదని, పూర్వీకుల నుంచి అందిన అమూల్యమైన వారసత్వంగా భావిస్తారు. ఒకప్పుడు గయాలో 40కి పైగా అఖాడాలు ఉండేవని, ప్రస్తుతం చాలా వరకు మూతపడ్డాయని, యువత జిమ్ముల వైపు మొగ్గుతో సంప్రదాయ మట్టి కుస్తీ కనుమరుగవుతోందని ఆయన ఆవేదన వ్యక్తం చేస్తున్నారు.

భారతీయ సంస్కృతిలో భాగమైన ఈ మట్టి కుస్తీని కాపాడేందుకు, దేశానికి గొప్ప మల్లయోధులను తయారు చేసేందుకు ప్రభుత్వం సహాయం అందించాలని హీరానాథ్ విజ్ఞప్తి చేస్తున్నారు. రాబోయే తరాలకు ఈ వారసత్వాన్ని అందించడమే తన లక్ష్యమని ఆయన చెబుతున్నారు.