అయోధ్య రామమందిరంలో బొబ్బిలి వీణ ఏర్పాటు: ఎమ్మెల్యే బేబీ నాయన

విజయనగరం జిల్లా బొబ్బిలి ప్రాంతానికి చెందిన ప్రత్యేక వీణను అయోధ్య రామమందిరంలో ఏర్పాటు చేయనున్నట్లు స్థానిక ఎమ్మెల్యే బేబీ నాయన తెలిపారు. ఈ వీణను బొబ్బిలికి చెందిన కళాకారుడు గంగాధరాచారి తయారు చేశారు.

ఈ వీణ ప్రత్యేకత ఏమిటంటే, దీన్ని పూర్తిగా ఒకే కర్రతో, జాయింట్ లేకుండా తయారు చేయడం. సాధారణంగా బొబ్బిలి వీణలకు జాయింట్ ఉంటుందని, కానీ ఈ వీణలో సింహ తలకాయతో సహా మొత్తం ఒకే కర్రను వాడారని గంగాధరాచారి వివరించారు. దీన్ని తయారు చేయడానికి ఆరు నెలల సమయం పట్టింది.

ఈ వీణలో ప్లాస్టిక్ వాడకుండా, కర్రపైనే అందమైన డిజైన్లు చెక్కారు. వీణ తుంబ (తలం) కూడా కర్రతోనే రూపొందించారు. మైనం బదులు ఇరిడి కర్ర జవలు ఉపయోగించి 24 శృతులు పలికేలా, అపశృతి రాకుండా శాశ్వతంగా ఉండేలా తయారు చేశారు.

ఈ వీణను ఈ నెల లేదా వచ్చే నెలలో మంచి రోజు చూసుకుని అయోధ్య రామాలయానికి తీసుకెళ్తామని ఎమ్మెల్యే తెలిపారు. వీణపై తెలుగు, హిందీ, ఇంగ్లీషులో ‘జై శ్రీరామ్’ అని రాసి ఉండటం ప్రత్యేక ఆకర్షణ.