BSNL శాటిలైట్ ఫోన్: ధర రూ.1.34 లక్షలు; పని తీరు, అనుమతులు వివరాలు

BSNL ఇటీవల కొత్త శాటిలైట్ ఫోన్ విడుదల చేసింది. దీని ధర రూ.1,34,166.

శాటిలైట్ ఫోన్లు అంతరిక్షంలోని శాటిలైట్ల ద్వారా కాల్స్ కనెక్ట్ చేస్తాయి. ఒక శాటిలైట్ ఫోన్ నుంచి మరో శాటిలైట్ ఫోన్ కు కాల్ చేసినప్పుడు, సిగ్నల్ మొదట శాటిలైట్ కు వెళ్తుంది. అక్కడి నుంచి గ్రౌండ్ స్టేషన్ కు చేరుతుంది. ఆపై తిరిగి శాటిలైట్ ద్వారా రిసీవర్ ఫోన్ కు కనెక్ట్ అవుతుంది. ఈ ప్రక్రియకు 0.5 నుంచి 1.5 సెకండ్లు పడుతుంది. సాధారణ టవర్ సిగ్నల్ ఫోన్లలో ఇది 0.05 నుంచి 0.15 సెకండ్లు మాత్రమే.

శాటిలైట్ ఫోన్ నుంచి సాధారణ ఫోన్లకు కూడా కాల్ చేయవచ్చు. అప్పుడు సిగ్నల్ శాటిలైట్ నుంచి గ్రౌండ్ స్టేషన్ కు చేరుతుంది. ఆపై టెలికాం నెట్వర్క్ ద్వారా సాధారణ ఫోన్ కు కనెక్ట్ అవుతుంది. సాధారణ ఫోన్ నుంచి శాటిలైట్ ఫోన్ కు కాల్ చేయాలంటే ఇదే ప్రక్రియ రివర్స్ లో జరుగుతుంది. అయితే ఇందుకు ప్రత్యేక అనుమతులు అవసరం.

శాటిలైట్ ఫోన్లు వరదలు, భూకంపాలు వంటి విపత్తు సమయంలోనూ పనిచేస్తాయి. సముద్రాలు, ఎడారులు, దట్టమైన అడవులు వంటి మారుమూల ప్రాంతాల్లోనూ సిగ్నల్ అందుబాటులో ఉంటాయి. వీటిని డిఫెన్స్, డిజాస్టర్ మేనేజ్మెంట్, మైనింగ్ కంపెనీలు, పరిశోధన సంస్థలు వంటి వారికి మాత్రమే విక్రయిస్తారు.

ఈ ఫోన్ల ధర ఎక్కువగా ఉండటానికి అనేక కారణాలు ఉన్నాయి. వీటిలో శక్తివంతమైన ట్రాన్స్మిటర్లు, యాంటినాలు ఉపయోగిస్తారు. కఠిన పరిస్థితుల్లో పనిచేసేలా బిల్డ్ క్వాలిటీ దృఢంగా ఉంటుంది. ఎక్కువ సమయం పనిచేసే భారీ బ్యాటరీ ఉంటుంది. వీటిని చాలా తక్కువ సంఖ్యలో తయారు చేస్తారు. నిర్వహణ ఖర్చు కూడా ఎక్కువ. అందుకే ధర ఎక్కువగా ఉంటుంది.

ఈ ఫోన్ కొనుగోలు చేయాలంటే డిపార్ట్మెంట్ ఆఫ్ టెలీకమ్యూనికేషన్స్ (DoT) నుంచి అనుమతి తప్పనిసరి. ఫోన్ ను ఎక్కడ, ఎంతకాలం, ఎందుకు ఉపయోగిస్తారో BSNL కు ముందే తెలియజేయాలి. అనుమతి లేకుండా ఉపయోగిస్తే జరిమానా లేదా జైలు శిక్ష పడుతుంది.