చైనా GDP వృద్ధి 4.3 శాతానికి పడిపోయింది, మార్కెట్ అంచనాలు అందుకోలేదు

2026 ఏప్రిల్-జూన్ త్రైమాసికంలో చైనా జీడీపీ వృద్ధి రేటు 4.3%గా నమోదైంది. మార్కెట్ వర్గాలు 4.5 నుంచి 5% వృద్ధిని అంచనా వేశాయి. ఈ వృద్ధి రేటు 2022 చివరి త్రైమాసికం తర్వాత నమోదైన అత్యల్ప స్థాయి.

దేశీయంగా వినియోగదారుల డిమాండ్ బలహీనంగా ఉండడం, రియల్ ఎస్టేట్ సంక్షోభం, అంతర్జాతీయ చమురు ధరల ప్రతికూల ప్రభావం వృద్ధిని దెబ్బతీసినట్లు విశ్లేషకులు చెబుతున్నారు. అయితే పారిశ్రామిక ఉత్పత్తి జూన్‌లో 5.3% పెరగడం, ఎలక్ట్రిక్ వాహనాలు, ఏఐ ఆధారిత ఎగుమతులు బలంగా కొనసాగుతున్నాయి.

రియల్ ఎస్టేట్ రంగం తీవ్ర ఒత్తిడిలో ఉంది. 2021లో 113 పాయింట్లుగా ఉన్న గృహ ధరల సూచిక 2025 చివరి నాటికి 86.79 పాయింట్లకు పడిపోయింది. ఫలితంగా నాలుగేళ్లలో దాదాపు 25% సంపద కోల్పోయారని డేటా చెబుతోంది. దేశంలో 39.1 కోట్ల చదరపు మీటర్ల మేర ఇల్లు అమ్ముడుపోకుండా ఉంది. 2025 మొదటి 10 నెలల్లో రియల్ ఎస్టేట్ పెట్టుబడులు 14.7% తగ్గాయి. ఎవర్‌గ్రాండే, కంట్రీ గార్డెన్ వంటి పెద్ద కంపెనీలు దివాలా తీశాయి.

నిరుద్యోగం కూడా పెరుగుతోంది. 16 నుంచి 24 ఏళ్ల వయసు ఉన్న యువతలో నిరుద్యోగం 25%కు చేరింది. జనాభా పెరుగుదల క్షీణిస్తోంది; 2022 నుంచి మరణాలు జననాల కంటే ఎక్కువగా నమోదవుతున్నాయి. అంతేకాకుండా విదేశీ పెట్టుబడులు భారీగా తగ్గాయి; తయారీ రంగం చైనా నుంచి భారత్, వియత్నాం వంటి దేశాలకు తరలిపోతోంది.

చైనా కమ్యూనిస్ట్ పార్టీ పొలిట్ బ్యూరో ఈ నెల చివర్లో సమావేశం కానుంది. ఈ సమావేశంలో ఆర్థిక పరిస్థితి ప్రధానంగా చర్చకు రానుంది. ప్రభుత్వం కొత్త ఉద్దీపన చర్యలు ప్రకటించే అవకాశం ఉంది. ఉద్యోగ కల్పన, సేవా రంగాలపై ప్రభుత్వం దృష్టి పెట్టొచ్చని విశ్లేషకులు అభిప్రాయపడుతున్నారు.