ధరణి అక్రమాలపై రాష్ట్రవ్యాప్తంగా CID దాడులు; తొమ్మిది మందిపై చర్యలు

ధరణి పోర్టల్ అక్రమాలపై తెలంగాణ రాష్ట్రవ్యాప్తంగా CID మెరుపు దాడులు చేసింది. 15 ప్రత్యేక బృందాలతో ఏకకాలంలో సోదాలు నిర్వహించింది. హైదరాబాద్, రంగారెడ్డి, మేడ్చల్, భువనగిరి, గజ్వేల్ ప్రాంతాల్లో ఈ దాడులు జరిగాయి.

మండల కార్యాలయాలతో పాటు ధరణి ప్రైవేట్ ఆపరేటర్లపై కూడా సోదాలు జరిపారు. పలువురు ఆపరేటర్లు, ప్రైవేట్ వ్యక్తులను అదుపులోకి తీసుకుని CID కార్యాలయానికి తరలించారు. ప్రాథమిక విచారణ తర్వాత నలుగురిని అరెస్టు చేశారు. ఇంతకుముందు నలుగురిపై చర్యలు తీసుకోగా, తాజా దాడులతో మరో నలుగురిపై చర్యలు తీసుకున్నారు. దీంతో ఈ కేసులో ఇప్పటివరకు మొత్తం తొమ్మిది మందిపై చర్యలు తీసుకున్నట్లు CID తెలిపింది.

భూముల రికార్డుల్లో అక్రమ మార్పులపై CID విచారణ చేపట్టింది. కోర్టు ఉత్తర్వులను ఆసరాగా చేసుకుని భూముల హక్కుల మార్పిడి చేసినట్లు ఆరోపణలు ఉన్నాయి. భూదాన్ భూముల బై నంబర్లపైనా విచారణ జరిపారు. ఫోరెన్సిక్ ఆడిట్లో డిజిటల్ ఫుట్‌ప్రింట్స్ గుర్తించారు.

2020లో అప్పటి ప్రభుత్వ హయాంలో ధరణి రికార్డుల డిజిటలైజేషన్ కోసం ఒక కంపెనీతో ఒప్పందం జరిగింది. ఆ ఒప్పందంలో భాగంగా భూముల రికార్డుల్లో మార్పులు జరిగాయి. ఈ మార్పుల్లో కొన్ని అక్రమాలు జరిగినట్లు CID గుర్తించింది. భూదాన్ భూముల బై నంబర్లను సృష్టించి, యజమానుల పేర్లను మార్చినట్లు కూడా గుర్తించారు.

CID DG చారు సింహ నేతృత్వంలోని SIT విచారణ ఆధారంగా ఈ చర్యలు చేపట్టారు. ప్రభుత్వం ఏర్పాటు చేసిన ప్రత్యేక బృందం ఈ సోదాలు నిర్వహించింది. అక్రమాల వెనుక ఉన్న సూత్రధారులపై CID దృష్టి సారించింది. విచారణ ఇంకా కొనసాగుతోంది.