ఎస్ఏఆర్ ప్రక్రియపై కాంగ్రెస్ జూమ్ సమావేశం; నిర్లక్ష్యంపై హెచ్చరికలు

ఓటరు జాబితా సవరణలో భాగమైన SAR ప్రక్రియ పురోగతిపై కాంగ్రెస్ పార్టీ గురువారం జూమ్ సమావేశం నిర్వహించనుంది.

సీఎం రేవంత్ రెడ్డి, పీసీసీ చీఫ్ మహేష్ కుమార్ గౌడ్, పార్టీ వ్యవహారాల ఇంచార్జి మీనాక్షి నటరాజన్, మంత్రులు, పీసీసీ సభ్యులు, ఉపాధ్యక్షులు ఈ సమావేశంలో పాల్గొననున్నారు.

కొన్ని నియోజకవర్గాల్లో పార్టీ నేతలు SAR ప్రక్రియలో నిర్లక్ష్యంగా వ్యవహరిస్తున్నారని నివేదికలు వచ్చాయి. కార్యకర్తల నియామకం, బూత్ స్థాయి ఏర్పాట్లలో జాప్యం జరుగుతోందని పార్టీ అభిప్రాయపడింది.

గత జూమ్ సమావేశంలోనే సీఎం రేవంత్ రెడ్డి నిర్లక్ష్యంగా పనిచేస్తున్న ఎమ్మెల్యేలు, నియోజకవర్గ ఇంచార్జిల పట్ల కఠినంగా ఉండాలని సూచించారు. పనితీరు మెరుగుపరచుకోకపోతే వారి స్థానంలో కొత్తవారిని నియమిస్తామని హెచ్చరించారు. ఈరోజు సమావేశంలోనూ ఈ అంశంపైనే ప్రధానంగా చర్చించనున్నారు.

రాష్ట్రం మొత్తం SAR ప్రక్రియను సమన్వయం చేసేందుకు గంపా వేణుగోపాల్ నేతృత్వంలో ప్రత్యేక వార్ రూమ్ ఏర్పాటు చేశారు. ప్రతి నియోజకవర్గం నుంచి నివేదికలు తీసుకొని, ఇప్పటివరకు ఏ స్థాయిలో ప్రోగ్రెస్ జరిగిందో ఈ సమావేశంలో సమీక్షించనున్నారు.