పత్తి విత్తనాలు వేసే ముందు తగినంత వర్షం కోసం వేచి ఉండాలని శాస్త్రవేత్తల సూచన

నైరుత్య రుతుపవనాలు జూన్ 8న రాష్ట్రంలోకి ప్రవేశించినా, చాలా ప్రాంతాల్లో సరిపడా వర్షాలు కురవలేదు. ఈ పరిస్థితుల్లో రైతులు ఆందోళన చెందాల్సిన అవసరం లేదని, మంచి వర్షం కురిసిన తర్వాతే పత్తి విత్తనాలు విత్తుకోవాలని ఆదిలాబాద్ వ్యవసాయ పరిశోధన స్థానం శాస్త్రవేత్త రాజశేఖర్ సూచించారు.

నల్లరేగడి భూముల్లో 50 నుంచి 60 మిల్లీమీటర్లు, ఎర్ర భూముల్లో 60 నుంచి 75 మిల్లీమీటర్ల వర్షం కురిసిన తర్వాతే విత్తడం వల్ల నాణ్యమైన విత్తనాల మొలకెత్తుదని, నష్టపోయే ప్రమాదం తక్కువని ఆయన వివరించారు. ఎల్నినో ప్రభావం వల్ల ఈ ఏడాది తక్కువ వర్షపాతం నమోదయ్యే అవకాశం ఉన్నందున, రైతులు ముందస్తు యాజమాన్య పద్ధతులు పాటించాలని సూచించారు.

పత్తి సాగులో అధిక సాంద్రత పద్ధతి (ఎకరాకు 4 ప్యాకెట్లు) ద్వారా మొక్కల సంఖ్య పెరిగి దిగుబడి పెరిగే అవకాశం ఉంటుందని, అంతర పంటగా కందిని సాగు చేస్తే ఒక పంట నష్టపోయినా మరో పంట ద్వారా లాభం వచ్చే అవకాశం ఉంటుందని చెప్పారు. పశువుల ఎరువు లేదా చెరువు మట్టి వేయడం, ఏటవాలుకు అడ్డంగా దున్నడం వంటి పద్ధతులతో భూమిలో తేమను నిలుపుకోవచ్చన్నారు. విత్తనాలను బయోపాలిమర్ ఆధారిత శిలీంధ్ర, కీటక నాశనాలతో శుద్ధి చేస్తే కొంచెం తేమ ఉన్నా మొలకెత్తే అవకాశం ఉంటుంది. మొక్కలు పెరిగాక కూడా అవసరమైన పోషక ద్రావణాలను 15 రోజులకోసారి పిచికారి చేయాలని, వాతావరణ సూచనల కోసం వ్యవసాయ విశ్వవిద్యాలయం, వ్యవసాయ శాఖ యాప్స్ ఉపయోగించుకోవాలని సూచించారు.