ఆంధ్రప్రదేశ్‌లో కోవిడ్-19 కేసులు పెరుగుతున్నాయి; నాలుగు మరణాలు నమోదు

ఆంధ్రప్రదేశ్‌లో కరోనా వైరస్ కేసులు మళ్ళీ పెరుగుతున్నాయి. ప్రస్తుతం రాష్ట్రంలో మొత్తం 32 యాక్టివ్ కేసులు నమోదయ్యాయి. ఇప్పటివరకు కడప జిల్లాలో అత్యధికంగా 8 కేసులు వెలుగు చూశాయి. కొద్ది రోజుల వ్యవధిలోనే ప్రాథమిక ఆరోగ్య సమస్యలతో బాధపడుతున్న నలుగురు మరణించారు. విజయవాడలో 13 ఏళ్ల బాలికకు పాజిటివ్ నిర్ధారణ కాగా, గుంటూరు, కృష్ణా, బాపట్ల జిల్లాల్లోనూ కేసులు నమోదవుతున్నాయి.

వైద్య నిపుణుల ప్రకారం ఒమిక్రాన్ సబ్ వేరియంట్ RF.5 వ్యాప్తి, వర్షాకాలం తేమ, మాస్క్ వాడకం తగ్గడం వంటివి కేసుల పెరుగుదలకు కారణాలుగా చెబుతున్నారు. అయితే నమోదైన మరణాలు ఇప్పటికే తీవ్రమైన షుగర్, బీపీ, కిడ్నీ సమస్యలతో బాధపడిన వారివేనని ఆరోగ్య శాఖ స్పష్టం చేసింది. ఆరోగ్యకరమైన వ్యక్తుల్లో వైరస్ తేలికపాటి జలుబు, జ్వరంతో తగ్గిపోతుందని వైద్యులు చెప్పారు.

ప్రభుత్వం అన్ని జిల్లాల్లో ప్రత్యేక కోవిడ్ వార్డులు సిద్ధం చేసింది. టెస్టింగ్ కిట్లు, పీపీఈ కిట్లు, అత్యవసర మందులు సిద్ధంగా ఉంచారు. వైరస్ నమూనాలను పుణెలోని నేషనల్ ఇన్‌స్టిట్యూట్ ఆఫ్ వైరాలజీకి పంపించారు.

తెలంగాణలో అధికారికంగా కోవిడ్ కేసులు నమోదు కాలేదు. కానీ హైదరాబాద్‌లో తీవ్రమైన జ్వరం, దగ్గు లక్షణాలతో ఆసుపత్రులకు వచ్చే రోగుల సంఖ్య పెరిగింది. గాంధీ ఆసుపత్రి డిప్యూటీ సూపరింటెండెంట్ డా. సునీల్ మాట్లాడుతూ, కోవిడ్ ఎండెమిక్‌గా మారిందని, ప్రత్యేక పరీక్షల అవసరం లేదని తెలిపారు. కాకపోతే వైరస్ కొత్త రూపంలో మారితేనే ఆందోళన చెందాల్సిన అగత్యముందన్నారు.

ప్రపంచ ఆరోగ్య సంస్థ కోవిడ్‌ను ప్రపంచ అత్యవసర పరిస్థితిగా పరిగణించడం లేదు. ఇది ఇప్పుడు సాధారణ ఫ్లూ లాంటి ఎండెమిక్‌గా మారింది. అయినా దీర్ఘకాలిక రోగులతో నివసించేవారు, వృద్ధులు మాస్కులు ధరించడం, చేతులు శుభ్రంగా ఉంచుకోవడం వంటి జాగ్రత్తలు పాటించాలని నిపుణులు సూచిస్తున్నారు. భయపడాల్సిన అవసరం లేదని, నమ్మకమైన సమాచారాన్నే విశ్వసించాలని వైద్యులు చెబుతున్నారు.