క్రిప్టో నష్టాలు.. పన్ను మినహాయింపు లేదు: నిపుణుల వివరణ

దేశంలో క్రిప్టో పెట్టుబడులపై వచ్చే నష్టాలను వేరే లాభాలతో సెట్ చేసుకోవడం కుదరదని ట్యాక్స్ నిపుణులు స్పష్టం చేశారు. ఇటీవల క్రిప్టో మినట్స్‌లో ట్రిగల్ సంస్థకు చెందిన ట్యాక్స్ పార్ట్నర్ మయపన్ నాగప్పన్ మాట్లాడుతూ, క్రిప్టో లావాదేవీలపై ఆదాయపు పన్ను రిటర్న్స్ దాఖలు చేసే సమయంలో నష్టాలను చూపించడానికి వీలు లేదన్నారు. బిట్‌కాయిన్ నష్టాన్ని ఇథీరియం లాభంతో గానీ, ఒకే రకమైన క్రిప్టో ఆస్తిలో వచ్చిన నష్టాన్ని మరో లాభంతో గానీ సర్దుబాటు చేసుకోవడాన్ని చట్టం అనుమతించదని తెలిపారు. అంతేకాకుండా ఇతర ఆదాయ వనరులతోనూ క్రిప్టో నష్టాలను సర్దుబాటు చేయరాదన్నారు.

క్రిప్టో ట్యాక్సేషన్‌ను ఆయన 'చాలా కఠినమైన విధానం'గా అభివర్ణించారు. 2022 నుంచి అమల్లో ఉన్న కొత్త నిబంధనల ప్రకారం క్రిప్టో లాభాలపై 30% పన్ను చెల్లించాల్సి ఉంటుంది, ఎలాంటి నష్టాన్ని ముందుకు తీసుకెళ్లడానికి వీల్లేదు. ఈక్విటీ, మ్యూచువల్ ఫండ్‌ల విషయంలో విధానం భిన్నంగా ఉంటుందని, వాటికి సంబంధించిన వివరాలు స్వయంచాలకంగా ఫైలింగ్‌లో చేరుతాయని, కానీ క్రిప్టోలో ఆటోమేటిక్ సమాచార సేకరణ ఇంకా పూర్తి స్థాయిలో లేదని నాగప్పన్ వివరించారు. ఎక్స్ఛేంజీలు టీడీఎస్ కట్ చేసినా, లావాదేవీల సమన్వయం, రిపోర్టింగ్ పూర్తిగా వినియోగదారుడి బాధ్యతగా మిగిలిపోయింది.

ఇక అంతర్జాతీయంగా కూడా కఠినతరం అవుతోంది. వచ్చే ఏప్రిల్ నుంచి క్రిప్టో అసెట్ రిపోర్టింగ్ ఫ్రేమ్‌వర్క్ (CARF) అమల్లోకి రానుంది. దీని ప్రకారం విదేశీ ఎక్స్ఛేంజీల్లో ట్రేడింగ్ చేసినా, ఆ సమాచారం భారత ప్రభుత్వంతో షేర్ అవుతుంది. దీంతో పన్ను ఎగవేతకు అవకాశాలు తగ్గుతాయని నిపుణులు హెచ్చరిస్తున్నారు. జూలై 31 లోపు ఐటీఆర్ దాఖలు చేసే వారు క్రిప్టో లావాదేవీలను సరిగ్గా నివేదించకపోతే నోటీసులు ఎదురయ్యే ప్రమాదం ఉందన్నారు.