ప్రదీప్ కన్స్ట్రక్షన్ భవనాన్ని కూల్చివేయాలని హైడ్రాకు ఎమ్మెల్యే దానం నాగేందర్ విజ్ఞప్తి

ఖైరతాబాద్ ఎమ్మెల్యే దానం నాగేందర్ సోజిగూడలోని ప్రదీప్ కన్స్ట్రక్షన్ భవనానికి హైడ్రా జారీ చేసిన నోటీసులను స్వాగతించారు. ఆ భవనం ఎఫ్టీఎల్ జోన్ లో నిబంధనలకు విరుద్ధంగా ఉందని, దాన్ని నిర్దాక్షణ్యంగా కూల్చివేయాలని హైడ్రాకు విజ్ఞప్తి చేశారు.

గత బీఆర్ఎస్ ప్రభుత్వంలో అప్పటి మంత్రి కేటీఆర్‌కు ఈ భవనం ఇల్లీగల్ అని తాను ఫిర్యాదు చేసినప్పటికీ పెడచెవిన పెట్టారని ఎమ్మెల్యే ఆరోపించారు. ఈ క్రమంలోనే ప్రదీప్ కన్స్ట్రక్షన్‌పై ఎన్ఆర్ఐ టీసీ అశోక్ చేసిన ఫిర్యాదుల వివరాలను ప్రస్తావించారు. టీసీ అశోక్ అనే సాఫ్ట్‌వేర్ కంపెనీ చైర్మన్ నుంచి రూ.42 కోట్లు వసూలు చేసి మోసం చేసినట్లు ఆరోపించారు.

అదే సందర్భంగా ఆదర్శ నగర్ లోని తన నివాసంలో కళ్యాణలక్ష్మి, షాదీ ముబారక్ పథకాలకు సంబంధించి సీఎంఆర్ఎఫ్ చెక్కులను లబ్ధిదారులకు పంపిణీ చేశారు.

స్థానికంగా రోడ్డు విస్తరణ కారణంగా ఇళ్లు కోల్పోయే వారికి స్థానికంగానే ప్రత్యామ్నాయ గృహాలు కేటాయిస్తామని ఎమ్మెల్యే హామీ ఇచ్చారు. ఈ వ్యవహారంలో బస్తీ ప్రజలు ఎలాంటి భయాందోళన చెందాల్సిన అవసరం లేదని స్పష్టం చేశారు.