డేటింగ్ యాప్ బర్నౌట్: అతి వినియోగంతో డిప్రెషన్, ఒంటరితనం పెరుగుతాయని పరిశోధనలు

డేటింగ్ యాప్‌లను ఎక్కువ కాలం ఉపయోగించేవారిలో "డేటింగ్ యాప్ బర్నౌట్" అనే మానసిక సమస్య కనిపిస్తోందని అమెరికాలోని అరిజోనా స్టేట్ యూనివర్శిటీ పరిశోధకులు తెలిపారు. ఈ బర్నౌట్ మూడు దశల్లో వ్యక్తమవుతుంది: తీవ్రమైన మానసిక అలసట, ఎదుటి వ్యక్తిని మనిషిగా కాకుండా కేవలం ప్రొఫైల్‌గా చూడటం, ఎంత ప్రయత్నించినా ఫలితం ఉండదనే భావన.

2024లో జరిగిన పరిశోధనల ప్రకారం, డేటింగ్ యాప్‌ల అతి వినియోగం డిప్రెషన్, ఒంటరితనం, ఆందోళన వంటి మానసిక సమస్యలను పెంచుతుంది. 26,000 మందిపై 17 సంవత్సరాల పాటు సాగిన విశ్లేషణలో ఈ విషయం వెల్లడైంది. ఇప్పటికే మానసికంగా ఇబ్బంది పడుతున్నవారిపై ప్రభావం మరింత తీవ్రంగా ఉంటుందని పరిశోధకులు హెచ్చరించారు.

ఈ సమస్యకు కారణం యాప్‌ల రూపకల్పనలోనే ఉంది. ఒక లైక్, మ్యాచ్ వస్తే ఆశ పెరుగుతుంది. ఇంకోసారి గంటల తరబడి ఏమీ రాకపోతే నిరాశ కలుగుతుంది. ఈ అనిశ్చితి మెదడులో ఆసక్తిని పెంచి, మరింత స్వైపింగ్ చేసేలా చేస్తుంది. ఫలితంగా వ్యక్తి ఫోన్ స్క్రీన్‌కే పరిమితమైపోతాడు. అంతేకాక, రోజుకు వందలాది ప్రొఫైల్స్ చూడటం వల్ల ఎంపికల సంక్షోభం ఏర్పడుతుంది. "ఇంకా మంచి వ్యక్తి దొరుకుతాడేమో" అనే ఆలోచనతో చాలా మంది నిజ జీవితంలో సంబంధాలను ఏర్పరచుకోలేకపోతున్నారు.

ఈ సమస్య నుంచి బయటపడేందుకు నిపుణులు కొన్ని సూచనలు చేశారు. ప్రేమ కోసం డేటింగ్ యాప్‌లపై మాత్రమే ఆధారపడకుండా, నిజ జీవితంలో కొత్త వ్యక్తులను కలిసే అవకాశాలను పెంచుకోవాలి. యాప్ వాడే సమయాన్ని పరిమితం చేసుకోవాలి. మానసిక ఒత్తిడి పెరిగితే స్నేహితులతో మాట్లాడాలి లేదా విరామం తీసుకోవాలి. కొన్ని డేటింగ్ యాప్ కంపెనీలు కూడా ఈ సమస్యను గుర్తించి, ఏఐ ఆధారిత మ్యాచింగ్, ప్రత్యేక సమావేశాలు వంటి కొత్త మార్గాలను ప్రయత్నిస్తున్నాయి. అయితే ఇవి ఎంతవరకు పనికొస్తాయనేది ఇంకా స్పష్టంగా తెలియలేదు.