ఢిల్లీలో పాకిస్తాన్ హై కమిషన్ వెలుపల బారికేడ్లు తొలగించిన పోలీసులు

ఢిల్లీలోని పాకిస్తాన్ హై కమిషన్ వెలుపల ఉన్న బారికేడ్లు, ట్రాఫిక్ స్టాండ్లను పోలీసులు తొలగించారు. వీసా విభాగం సమీపంలో ఏర్పాటు చేసిన క్యూ లైన్ మేనేజ్మెంట్ వ్యవస్థను కూడా తొలగించారు. ఒక రేకుల షెడ్డును కూడా కూల్చారు.

మూడు రోజుల క్రితం ఇస్లామాబాద్‌లోని భారత హై కమిషన్ వెలుపల ఉన్న భద్రతా బారికేడ్లు, పార్కింగ్ పోల్స్‌ను పాకిస్తాన్ పోలీసులు తొలగించారు. దీనికి ప్రతిస్పందనగా ఢిల్లీ పోలీసులు ఈ చర్య తీసుకున్నారు.

గతరాత్రి వరకు పాకిస్తాన్ హై కమిషన్ వెలుపల బారికేడ్లు, ఇతర భద్రతా ఏర్పాట్లు ఉన్నాయి. పాకిస్తాన్ మిషన్ కాంపౌండ్ పరిధి దాటి కొన్ని నిర్మాణాలు ఉన్నందున వాటిని తొలగించినట్లు అధికార వర్గాలు తెలిపాయి.

పహల్గాం ఉగ్రదాడి తర్వాత ఇరు దేశాల మధ్య ఉద్రిక్తతలు పెరిగాయి. ఈ చర్య ఆ ఉద్రిక్తతల నేపథ్యంలో చోటు చేసుకుంది.